O‘zbekistonda 2030 yilga qadar umr davomiyligi 78 yoshga yetadi
O‘zbekistonda aholining umr davomiyligini oshirish bo‘yicha 2030 yilgacha mo‘ljallangan keng ko‘lamli reja tasdiqlandi. Bu haqda Zamin.uz xabar berdi.
Ushbu dastur aholining salomatligini yaxshilash va tibbiyot tizimini rivojlantirishga qaratilgan. Rejaga muvofiq, 2026 yilgacha aholining o‘rtacha umr davomiyligi 75,5 yoshga, 2027 yilgacha 76 yoshga, 2028 yilgacha 76,8 yoshga, 2029 yilgacha 77,5 yoshga yetkazilishi nazarda tutilgan.
2030 yilga kelib esa bu ko‘rsatkichni 78 yoshga yetkazish maqsad qilingan. Mazkur maqsadlarga erishish uchun sog‘liqni saqlash sohasiga ajratiladigan mablag‘lar sezilarli darajada oshiriladi.
Jumladan, 2030 yilga qadar ushbu soha uchun ajratiladigan mablag‘lar mamlakat yalpi ichki mahsulotining 5 foizini tashkil etishi rejalashtirilgan. Shuningdek, yurak-qon tomir, saraton, nafas yo‘llari kasalliklari kabi jiddiy muammolarning oldini olishga alohida e’tibor qaratiladi.
Xususan, yurak-qon tomir kasalliklaridan erta o‘limni 30-69 yosh oralig‘ida 27 foizga kamaytirish, saraton kasalligidan erta o‘limni 5,2 foizga qisqartirish va qandli diabet bilan kasallangan bemorlarni to‘liq davolash kabi vazifalar belgilangan. Milliy statistika qo‘mitasi ma’lumotlariga ko‘ra, O‘zbekistonda aholining o‘rtacha umr davomiyligi sezilarli o‘sib bormoqda.
Masalan, 1991 yilda bu ko‘rsatkich 66,4 yoshni tashkil etgan bo‘lsa, 2023 yilda 74,7 yoshga yetgan. 2024 yilga kelib esa bu raqam 75,1 yoshga yetishi kutilmoqda.
Prezident Shavkat Mirziyoyevning ta’kidlashicha, so‘nggi yillarda tibbiyot sohasiga ajratilgan mablag‘lar 6 barobar oshirilgan. Natijada, aholi salomatligi yaxshilanib, umr davomiyligi uzaygan.
Ushbu natijalar mamlakatda sog‘liqni saqlash tizimini rivojlantirish va aholi turmush sifatini yaxshilash borasidagi sa’y-harakatlarning samarasi sifatida baholanmoqda.
