O‘zbekistonda 2030 yilga borib umr ko‘rish 78 yoshga yetadi
O‘zbekistonda 2030 yilga borib aholi o‘rtacha umr ko‘rish davomiyligini 78 yoshga yetkazish maqsadi qo‘yilgan. Bu haqda Zamin.uz xabar berdi.
Ushbu ma’lumot “O‘zbekiston–2030” strategiyasi loyihasida qayd etilgan bo‘lib, bu haqda Podrobno.uz xabar berdi. Rejaga ko‘ra, bu ko‘rsatkich bosqichma-bosqich oshib boradi: 2026 yilda 75,5 yosh, 2027 yilda 76 yosh, 2028 yilda 76,8 yosh, 2029 yilda 77,5 yosh va 2030 yilda 78 yoshga yetishi rejalashtirilgan.
Mazkur maqsadga erishish uchun sog‘liqni saqlash tizimiga ajratiladigan mablag‘lar oshiriladi. Jumladan, 2030 yilga kelib davlat budjetidan tibbiyotga ajratmalar yalpi ichki mahsulotning 5 foizigacha yetkazilishi ko‘zda tutilgan.
Strategiyada muddatidan oldin o‘lim holatlarini kamaytirish ham muhim yo‘nalishlardan biri sifatida belgilangan. Xususan, 30–69 yosh oralig‘ida yurak-qon tomir kasalliklari tufayli erta o‘lim ko‘rsatkichini 27 foizgacha, onkologik kasalliklardan esa 5,2 foizgacha tushirish rejalashtirilgan.
Bundan tashqari, surunkali kasalliklar bilan kurashish choralari ustuvor yo‘nalish sifatida belgilangan. Masalan, qandli diabet bilan og‘rigan bemorlarni to‘liq davolash, nafas olish a’zolari kasalliklaridan erta o‘lim ko‘rsatkichini 1,5 foizdan oshirmaslik va sil kasalligiga chalinish darajasini 33 foizdan yuqori bo‘lmagan holatda ushlab turish maqsad qilingan.
Milliy statistika qo‘mitasi ma’lumotlariga ko‘ra, so‘nggi o‘n yillikda O‘zbekistonda o‘rtacha umr ko‘rish davomiyligi izchil o‘sib kelmoqda. Masalan, 1991 yilda bu ko‘rsatkich 66,4 yoshni tashkil etgan bo‘lsa, 2010 yilda 73 yoshga, 2023 yilda esa 74,7 yoshga yetgan.
Rasmiylar amalga oshirilayotgan chora-tadbirlar nafaqat umr davomiyligini uzaytirishi, balki tibbiy yordam sifati va profilaktika choralarini yaxshilash orqali hayot sifatini ham oshirishini ta’kidlamoqda.
