Korrupsiyani fosh qilganlar himoyasi kuchaytiriladi

O‘zbekistonda korrupsiya holatlari haqida ma’lumot bergan fuqarolarni himoya qilish uchun yangi mexanizm joriy etiladi. Bu haqda Zamin.uz xabar berdi.

Bu Prezident farmonida belgilangan bo‘lib, korrupsiyaga qarshi kurash tizimini takomillashtirish va fuqarolarni qo‘llab-quvvatlashga qaratilgan. Ushbu farmonga muvofiq, Korrupsiyaga qarshi kurashish agentligi korrupsiya to‘g‘risida xabar bergan shaxslarga himoya orderi beradi.

Bu order ularni bosim va ta'qiblardan himoya qilish uchun qo‘llaniladi. Shuningdek, korrupsiyaga qarshi kurashda faol ishtirok etgan shaxslarni rag‘batlantirish maqsadida “Korrupsiyaga qarshi kurashga qo‘shgan hissa uchun” ko‘krak nishoni ta’sis etiladi.

Bu bilan korrupsiyaga qarshi kurashda fuqarolarning faol ishtiroki rag‘batlantiriladi. 2026 yil iyun oyiga qadar Agentlik boshqa davlat idoralari bilan hamkorlikda rag‘batlantirish tizimini tartibga soluvchi normativ-huquqiy hujjat loyihasini ishlab chiqadi.

Shu jumladan, “E-Anticor.uz” platformasi Janubiy Koreyaning Clean Portal tajribasi asosida modernizatsiya qilinadi va raqamlashtirish ishlari amalga oshiriladi. Ushbu platforma orqali korrupsiya holatlari haqida xabar bergan shaxslarni qo‘llab-quvvatlash ko‘zda tutilgan.

2026 yil 1 iyuldan “Raqamli komplaens” axborot tizimi sinov tariqasida ishga tushiriladi. Ushbu tizim orqali davlat organlari va tashkilotlar o‘rtasida tezkor axborot almashinuvi ta’minlanadi va ichki antikorrupsiya bo‘linmalari faoliyati raqamlashtiriladi.

Farmon bilan Agentlikka davlat organlari va tashkilotlarga qoidabuzarliklarning oldini olish bo‘yicha majburiy tavsiyalar berish huquqi ham berilgan. Bundan tashqari, korrupsiyaga qarshi kurash klasteri faoliyati tasdiqlangan bo‘lib, u davlat organlari, huquqni muhofaza qiluvchi tuzilmalar va fuqarolik jamiyati institutlari o‘rtasida hamkorlikni mustahkamlashga qaratilgan.

Manba: podrobno.uz