Qirg‘iziston O‘zbekistonga shakar eksportini 39 foizga oshirdi
Qirg‘iziston 2025-yilning yanvar–oktabr oylarida O‘zbekiston bozoriga 17,6 ming tonna shakar eksport qilgan. Bu haqda Zamin.uz xabar berdi.
Bu ko‘rsatkich o‘tgan yilning shu davriga nisbatan 39 foizga ko‘proqdir. Mazkur ma’lumotni kursiv.uz xabar qildi.
Shuningdek, eksportdan tushgan daromad ham oshgan. O‘tgan yilda bu ko‘rsatkich 8,7 million dollarni tashkil qilgan bo‘lsa, joriy yilda 12 million dollarga yetgan.
Shakar eksporti faqat O‘zbekiston bilan cheklanmay, boshqa davlatlarga ham amalga oshirilgan. Jumladan, Tojikistonga 108 tonna, Afg‘onistonga esa 15 tonna shakar jo‘natilgan.
O‘zbekiston Milliy statistika qo‘mitasi bergan ma’lumotlarga ko‘ra, 2025-yilning noyabr oyiga kelib mamlakat oziq-ovqat importi hajmi 3,5 milliard dollardan oshgan. Bu ko‘rsatkich o‘tgan yilga nisbatan 18 foizga yuqori.
Bundan tashqari, joriy yilning dastlabki o‘n oyida O‘zbekiston va Qirg‘iziston o‘rtasidagi savdo hajmi 787,3 million dollarni tashkil qilgan. Bu esa 2024-yilning mos davridagi 674,4 million dollarga nisbatan sezilarli o‘sishdir.
Manba: kursiv.uz
