Qutqaruvchilikka yosh chegarasi: 18–30 yosh bo‘ladi

O‘zbekistonda qutqaruvchi lavozimiga ishga qabul qilish tartibiga yosh chegarasi belgilanishi rejalashtirilmoqda. Bu haqda Zamin.uz xabar berdi.

Bu o‘zgarishlar “Qutqaruv xizmati va qutqaruvchi maqomi to‘g‘risida”gi qonunning 9-moddasiga taklif qilinayotgan o‘zgartirishlar orqali amalga oshiriladi. Qonun loyihasiga ko‘ra, qutqaruvchi lavozimiga ishga qabul qilishda yoki qutqaruvchilarni tayyorlashga mo‘ljallangan ta’lim muassasalariga o‘qishga faqat 18 yoshdan 30 yoshgacha bo‘lgan O‘zbekiston fuqarolari qabul qilinishi belgilangan.

Nomzodlar umumiy o‘rta ma’lumotga ega bo‘lishi, tibbiy ko‘rikdan o‘tib, qutqaruvchilik faoliyati uchun yaroqliligi tasdiqlangan bo‘lishi kerak. Shuningdek, ular kasbiy, jismoniy va ma’naviy-ruhiy tayyorgarlik talablariga javob berishi lozim.

Hozirgi kunda qutqaruvchi lavozimiga ishga qabul qilishda yosh bo‘yicha hech qanday cheklov mavjud emas. Shu sababli 18 yoshdan 50 yoshgacha bo‘lgan fuqarolar bu lavozimga qabul qilinib kelinmoqda.

Ma’lumotlarga ko‘ra, hozirda Favqulodda vaziyatlar vazirligi tizimida 40 yoshdan 50 yoshgacha bo‘lgan 1 658 nafar va 50 yoshdan oshgan 826 nafar qutqaruvchi faoliyat olib bormoqda. Mutaxassislarning fikriga ko‘ra, yuqori yoshdagi qutqaruvchilarning faoliyati ba’zi ishlarning samaradorligini pasaytirishi va yong‘inlarni bartaraf etishda qiyinchiliklar keltirib chiqarishi mumkin.

Bu holat, shuningdek, qutqaruv xizmatlarining jangovar shayligini susaytirayotgani ta’kidlanmoqda.