Mahalliy hokimiyat faoliyati raqamlashtiriladi va soddalashtiriladi
O‘zbekistonning 2030-yilgacha bo‘lgan rivojlanish strategiyasida mahalliy davlat hokimiyati organlari faoliyatini takomillashtirish bo‘yicha muhim vazifalar belgilangan. Bu haqda Zamin.uz xabar berdi.
Ushbu strategiya doirasida mahalliy kengashlarning ta’sirchanligi va javobgarligini oshirish, ularni aholining manfaatlarini ifoda etuvchi asosiy institutga aylantirishga alohida e’tibor qaratilgan. Dasturning 364-bandiga ko‘ra, mahalliy kengashlar faoliyatini samarali tashkil etish uchun beshta qonunchilik hujjatini takomillashtirish rejalashtirilgan.
Bu orqali vakillik organlari vakolatlarini kengaytirish, nazorat mexanizmlarini kuchaytirish va jamoatchilik bilan muloqotni yanada samarali qilish ko‘zda tutilgan. Shuningdek, 365-bandda mahalliy kengashlar faoliyatini to‘liq raqamlashtirish belgilangan.
Mazkur jarayon orqali qarorlarni qabul qilish, muhokamalarni o‘tkazish va nazorat-tahlil ishlarini shaffof va tezkor tashkil etish maqsad qilingan. Bu aholiga ochiq axborot muhitini kengaytirishga xizmat qiladi.
Strategiyada mahalliy davlat hokimiyati ijro organlarini yangilash va modernizatsiya qilish ustuvor yo‘nalish sifatida qayd etilgan. 366-bandga muvofiq, hokimlar va ularning o‘rinbosarlari tomonidan tayyorlanadigan hujjatlarni to‘liq E-qaror elektron tizimiga o‘tkazish rejalashtirilgan.
Bu esa hujjat aylanishini elektron shaklga o‘tkazib, qog‘ozbozlikni kamaytiradi va jarayonlarni soddalashtiradi. Bundan tashqari, 367-bandda har yili respublika darajasidagi 50 ga yaqin funksiyani mahalliy ijro hokimiyati organlariga o‘tkazish belgilangan.
Bu hududlardagi muammolarni tezroq hal qilish va qarorlarni aholiga yaqinlashtirish imkonini beradi. 368-bandda esa “byurokratiyani nol” tamoyiliga amal qilish orqali jarayonlarni soddalashtirish, talab qilinadigan hujjatlarni kamaytirish va xizmat ko‘rsatish tezligini oshirish vazifasi qo‘yilgan.
369-bandga ko‘ra, turli sohalarga oid 20 dan ortiq elektron tizimni hokimliklar faoliyatiga joriy etish rejalashtirilgan. Bu hududiy boshqaruvda ma’lumot almashinuvi va monitoring mexanizmlarini kuchaytirishga xizmat qiladi.
Manba: One.uz
