Boysun tumanida neft sizib chiqishi jilovlandi

Surxondaryo viloyati Boysun tumanida joylashgan “M-25” konida 2025 yilning oxirida tarkibida neft bo‘lgan suyuqlikning yer yuzasiga sizib chiqishi kuzatildi. Bu haqda Zamin.uz xabar berdi.

Ushbu holat aniqlangach, mas’ul tashkilotlar darhol zarur choralarni ko‘rishga kirishdi. Energetika vazirligi 2026 yil 5 yanvar kuni rasmiy bayonot berib, neft suyuqligining atrofga keng tarqalishini oldini olish maqsadida maxsus himoya hovuzlari tashkil etilganini ma’lum qildi.

Ushbu hovuzlar kon atrofida va soy yo‘nalishida joylashtirilib, neft suyuqligini nazorat ostida ushlab turishga xizmat qilmoqda. Vazirlikning ma’lumotiga ko‘ra, yig‘ilgan neft suyuqligi maxsus ajratilgan hududga uzluksiz tashib chiqilmoqda.

U yerda har birining sig‘imi 5 ming kub metr bo‘lgan, to‘liq izolyatsiya qilingan ikkita shlam hovuzi mavjud. Ushbu inshootlar neft suyuqligini xavfsiz saqlash va uni keyinchalik qayta ishlash imkonini beradi.

Barcha ishlar sanoat xavfsizligi va ekologik talablar asosida olib borilayotgani ta’kidlanmoqda. Neft suyuqligidan olingan namunalar laboratoriya tahlillariga jo‘natilgan.

Tahlil natijalariga ko‘ra, suyuqlikni qayta ishlash imkoniyatlari baholanadi. Shu bilan birga, geologik tadqiqotlar ham davom etmoqda.

Hozirda mazkur hudud doimiy monitoring ostiga olingan. Neft suyuqligining tarqalishi jilovlangan va dastlabki kunlarda kanalga oqib chiqqan suyuqliklarni tozalash ishlari bosqichma-bosqich amalga oshirilmoqda.

Mutaxassislar vaziyat to‘liq nazoratda ekanini ta’kidlashmoqda. Manba: One.uz