Boysunda neft sizib chiqishi jilovlandi, choralar ko‘rildi
Energetika vazirligi xabariga ko‘ra, Boysundagi “M-25” neft koni hududida neft sizib chiqishi qayd etildi. Bu haqda Zamin.uz xabar berdi.
Ushbu hodisaning oldini olish va atrof-muhitga zarar yetkazmaslik maqsadida hududda qo‘shimcha choralar ko‘rildi. Xususan, soy o‘zani bo‘ylab maxsus himoya hovuzlari qurildi.
Hodisa natijasida yig‘ib olingan neft suyuqligi maxsus maydonga uzluksiz yetkazib berilmoqda. Bu maydonda har biri 5 ming kub metr hajmga ega bo‘lgan, maxsus izolyatsiyalangan ikki shlam hovuzi tashkil etilgan.
Ushbu hovuzlar neftni xavfsiz saqlash va keyinchalik undan samarali foydalanish imkonini beradi. Vazirlikning bildirishicha, barcha ishlar sanoat va ekologik xavfsizlik talablariga to‘liq rioya qilgan holda amalga oshirilmoqda.
Ayni paytda neft namunalarini tahlil qilish ishlari olib borilmoqda. Tahlil natijalariga ko‘ra, ushbu neftni qayta ishlash imkoniyatlari o‘rganiladi.
Shu bilan birga, hududda geologik tadqiqotlar ham davom ettirilmoqda. Vaziyat doimiy monitoring ostida ekanligi ta’kidlandi.
Hozirda neft suyuqligi jilovlangan bo‘lib, dastlabki kunlarda kanalga oqib ketgan neftni tozalash ishlari amalga oshirilmoqda. Manba: One.uz.
