Toshkentda Telegram orqali giyohvand savdosi fosh etildi
Toshkent shahrida Telegram-bot orqali giyohvand moddalar savdosini tashkil qilgan uch nafar shaxs qo‘lga olindi. Bu haqda Zamin.uz xabar berdi.
Ular to‘lovlarni anonim tarzda kriptovalyuta orqali qabul qilib kelgani ma’lum bo‘ldi. Huquqni muhofaza qilish organlari bergan ma’lumotga ko‘ra, ushbu jinoiy guruhning umumiy moliyaviy aylanmasi 2,3 million AQSh dollarini tashkil etgan.
Bu haqda Kursiv.uz xabar bermoqda. Mazkur holat yuzasidan maxsus tadbir Toshkentning Yunusobod tumanida o‘tkazilgan.
Aniqlanishicha, gumonlanuvchilar aynan shu tumanda Telegram kanalini boshqarish, buyurtmalarni qabul qilish va ularni qayta ishlash bilan shug‘ullangan. O‘tkazilgan tintuvlar davomida ulardan bir qator daliliy ashyolar, jumladan noutbuklar, mobil telefonlar, SIM-kartalar, bank kartalari hamda katta miqdordagi giyohvand moddalar musodara qilingan.
Shuningdek, gumonlanuvchilardan birining yashash joyida sotuvga tayyor holatdagi 550 doza kuchli ta’sirga ega modda topilgan. Tergov ma’lumotlariga ko‘ra, ushbu guruh minglab noqonuniy operatsiyalarni xorijdagi kriptohamyonlar orqali amalga oshirib, daromad manbaini yashirishga uringan.
Holat yuzasidan Jinoyat kodeksining bir necha moddalari, jumladan giyohvand moddalarni noqonuniy muomalaga kiritish va jinoiy yo‘l bilan topilgan daromadlarni legallashtirishga oid bandlar asosida jinoyat ishi qo‘zg‘atilgan. Ayni paytda tergov ishlari davom etmoqda.
