Yangihayotda ko‘chalarga yangi nom berish taklif etildi
Toshkent shahrining Yangihayot tumanida ayrim ko‘cha va mavzelar nomini o‘zgartirish bo‘yicha takliflar jamoatchilik muhokamasiga taqdim etildi. Bu haqda Zamin.uz xabar berdi.
Bu haqda tuman hokimiyati matbuot xizmati ma’lum qildi. Ushbu tashabbusga ko‘ra, nafaqat mavjud ko‘chalar nomlari qayta ko‘rib chiqiladi, balki hozircha nomlanmagan ko‘chalarga ham rasmiy nomlar berilishi rejalashtirilmoqda.
Shahar geografik obyektlar bo‘yicha mas’ul komissiya poytaxt aholisi fikrini yig‘ishni boshlab yuborgan. Bu jarayon “Geografik obyektlar nomlari to‘g‘risida”gi qonun talablari asosida tashkil etilgan bo‘lib, qarorlar mahalliy aholi fikri inobatga olingan holda qabul qilinadi.
Muhokama jarayonida fuqarolar o‘z fikrlarini geonom.tashkent.uz maxsus portali orqali bildirishlari mumkin. Shuningdek, ular 19-yanvargacha (71) 210-04-13 telefon raqamiga qo‘ng‘iroq qilish yoki hokimiyatga yozma murojaat yuborish orqali ham o‘z pozitsiyasini izhor etish imkoniyatiga ega.
Ushbu tashabbus Yangihayot tumani administratsiyasi tomonidan ilgari surilgan bo‘lib, aholi bilan yaqin hamkorlikda amalga oshirilmoqda.
