O‘zbekiston 2026 yilda sayyohlar uchun eng arzon yo‘nalishlardan biri bo‘ldi
Tutu xizmatining yangi reytingiga ko‘ra, 2026 yilda rossiyalik sayyohlar uchun eng arzon va maqbul sayyohlik yo‘nalishlari uchligiga O‘zbekiston ham kiritildi. Bu haqda Zamin.uz xabar berdi.
Bu haqda TASS axborot agentligi xabar berdi. Reyting natijalariga ko‘ra, O‘zbekistonda ikki kishi uchun bir haftalik dam olish o‘rtacha 93 ming rublga, ya’ni taxminan 14,2 million so‘mga teng bo‘lmoqda.
Ushbu ro‘yxatda birinchi o‘rinni Belarus egalladi. Bu mamlakatda ikki kishilik bir haftalik dam olish xarajatlari o‘rtacha 80 ming rubl (12,2 million so‘m) atrofida baholangan.
Uchlikni esa Qirg‘iziston yakunlab, u yerda shunday dam olish narxi taxminan 105 ming rubl (16,1 million so‘m)ni tashkil etdi. Ro‘yxatga, shuningdek, Armaniston, Gruziya, Turkiya va Xitoy kabi davlatlar ham kiritilgan.
Mutaxassislarning ta’kidlashicha, yaqin xorij mamlakatlari narx va dam olish imkoniyatlari o‘rtasidagi muvozanatni saqlagan holda sayyohlar uchun eng qulay yo‘nalishlar bo‘lib qolmoqda. O‘zbekiston ayniqsa sayyohlar orasida o‘zining boy madaniy merosi, tarixiy shaharlari va milliy taomlari bilan ajralib turadi.
Samarqand, Buxoro va Xiva kabi tarixiy shaharlarga bo‘lgan qiziqish yil sayin oshib bormoqda. Shuningdek, mamlakatda sayohat xarajatlarining nisbatan pastligi ham diqqatga sazovor omillardan biridir.
Shu tariqa, O‘zbekiston 2026 yilda ham sayyohlar uchun hamyonbop va mazmunli dam olishni ta’minlaydigan eng jozibador yo‘nalishlardan biri bo‘lib qolmoqda.
