O‘zbekistonga kelayotgan chet ellik talabalar soni oshdi
O‘zbekistonga o‘qish maqsadida kelayotgan chet ellik talabalar soni sezilarli darajada oshgani haqida yangi ma’lumotlar e’lon qilindi. Bu haqda Zamin.uz xabar berdi.
Milliy statistika qo‘mitasi tomonidan taqdim etilgan ma’lumotlarga ko‘ra, 2025 yilning yanvar-noyabr oylarida mamlakatimizga ta’lim olish uchun jami 37,2 ming nafar chet el fuqarosi kelgan. Bu ko‘rsatkich o‘tgan yilning xuddi shu davriga nisbatan 54,3 foizga ko‘proqdir.
Qo‘mitaning tahlillariga ko‘ra, O‘zbekistonga o‘qish uchun keluvchi talabalarning asosiy qismi Hindiston, Turkmaniston va Tojikistondan bo‘lib, ular orasida Hindiston yetakchilik qilmoqda. 2025 yilning dastlabki 11 oyida Hindistondan 16,3 ming nafar, Turkmanistondan 8,9 ming nafar, Tojikistondan esa 2,7 ming nafar talaba mamlakatimizga ta’lim olish uchun tashrif buyurgan.
Shuningdek, Pokiston (1,7 ming nafar), Xitoy (1,4 ming nafar), Janubiy Koreya (870 nafar), Qirg‘iz Respublikasi (823 nafar) kabi davlatlardan ham talabalarning O‘zbekistonni tanlashi kuzatilgan. Qolgan davlatlar orasida Misr (737 nafar), Filippin (501 nafar), AQSh (464 nafar), Turkiya (357 nafar), Afg‘oniston (291 nafar), Buyuk Britaniya (179 nafar), Rossiya (164 nafar), Janubiy Afrika Respublikasi (155 nafar), Eron (115 nafar), Qozog‘iston (113 nafar), Bangladesh (97 nafar) va Italiya (94 nafar) talabalari ham bor.
Mazkur o‘sish ta’lim sohasida O‘zbekistonning xalqaro hamkorlik imkoniyatlari kengayib borayotganini ko‘rsatadi. Bundan tashqari, Janubiy Koreyada o‘qiyotgan o‘zbekistonlik talabalar sonining ham sezilarli darajada oshgani kuzatilgan.
2024 yilning birinchi yarmida ushbu davlatda tahsil olayotgan o‘zbekistonlik talabalar soni 5 ming nafarga yetgani qayd etilgan. Bu esa O‘zbekistonning xalqaro ta’lim bozoridagi o‘rnini mustahkamlayotganidan dalolat beradi (manba: One.uz).
