O‘zbekistonda huquqbuzarliklarni xabar qilish ilovasi yaratiladi

O‘zbekistonda fuqarolarga huquqbuzarlik holatlari haqida tezkor xabar berish imkonini beruvchi mobil ilova joriy etilishi rejalashtirilmoqda. Bu haqda Zamin.uz xabar berdi.

Ushbu loyiha Prezident Shavkat Mirziyoyev tomonidan imzolangan hujjat asosida amalga oshiriladi. Bu haqda kursiv.uz xabar berdi.

Ichki ishlar vazirligi mazkur ilova orqali murojaatlarni real vaqt rejimida qabul qilish tizimini yo‘lga qo‘yadi. Shu maqsadda patrul xodimlari zamonaviy planshetlar bilan ta’minlanadi.

Tizim qoidabuzarliklar qayerda sodir bo‘lishidan qat’i nazar, ularga tezkor choralar ko‘rishni ta’minlashga xizmat qiladi. “Mening inspektorim” deb nomlangan ushbu mobil ilovani 2026 yil noyabriga qadar ishga tushirish rejalashtirilgan.

Ilova orqali fuqarolar inspektorlar bilan bevosita muloqot qilishlari, foto, audio va video shaklidagi xabarlarni yuborishlari hamda xavotir signallarini yetkazishlari mumkin bo‘ladi. Shuningdek, foydalanuvchilar inspektorlar faoliyatini baholash imkoniyatiga ham ega bo‘ladilar.

Bundan tashqari, 2026 yil may oyiga qadar oilaviy nizolar kuzatiladigan xonadonlar bilan ishlashga mo‘ljallangan alohida tizimni joriy etish ham ko‘zda tutilgan. Ushbu tizim ma’lumotlarni yig‘ish va tahlil qilish orqali maishiy jinoyatlarning oldini olishga yordam beradi.

Bu kabi chora-tadbirlar fuqarolar xavfsizligini ta’minlash va huquqni muhofaza qilish organlari faoliyatini takomillashtirishga qaratilgan.