2026 yil ish vaqti kalendari tasdiqlandi
Kambag‘allikni qisqartirish va bandlik vazirligi 2026 yil uchun mo‘ljallangan ish vaqti kalendarini ishlab chiqdi. Bu haqda Zamin.uz xabar berdi.
Bu haqda vazirlik matbuot xizmati xabar berdi. Mazkur hujjat O‘zbekiston Respublikasi Mehnat kodeksi, Prezidentning “2026 yilda rasmiy sanalarni nishonlash davrida qo‘shimcha ishlanmaydigan kunlarni belgilash va dam olish kunlarini ko‘chirish to‘g‘risida”gi farmoni hamda 2025 va 2026 yil kalendarlari asosida tayyorlangan.
Unda turli ish haftalari uchun ish soatlari va kunlarining aniq hisob-kitoblari ko‘rsatilgan. Jumladan, 5 kunlik (40 soatlik), 6 kunlik (40 soatlik) va 6 kunlik (36 soatlik) ish haftalari bo‘yicha oylar, choraklar, yarim yillik va yilning umumiy ish soatlari me’yori belgilangan.
Shuningdek, 2026 yilda nishonlanadigan rasmiy bayram kunlari va bayramoldi ish kunlari uchun ham ish vaqti me’yorlari alohida tartibda belgilab o‘tilgan. Vazirlikning qayd etishicha, mazkur kalendardan turli maqsadlarda foydalanish mumkin.
Jumladan, ish jadvallarini tuzishda, xodimlarning ta’tillarini rejalashtirish va rasmiylashtirishda, shuningdek, oylik, choraklik va yillik ish soatlarini aniqlashda ushbu hujjat amaliy yordam beradi. Shu bilan birga, agar Prezident farmoni bilan qo‘shimcha dam olish kunlari belgilansa yoki dam olish kunlari ko‘chirilsa, kalendar yangilanishi mumkinligi ham alohida ta’kidlangan.
