Metan zapravkalari ish vaqti qisqartirildi.
8-yanvardan boshlab O‘zbekistonda metan gaz quyish shoxobchalari ish vaqti vaqtinchalik qisqartiriladi. Bu haqda Zamin.uz xabar berdi.
Energetika vazirligi bergan ma’lumotga ko‘ra, avtomobillarga yoqilg‘i quyish shoxobchalari (AYoQSh) soat 10:00 dan 16:00 gacha faoliyat ko‘rsatadi. Bu cheklovlar magistral gaz quvurlarida bosim pasaygani sababli joriy etilgan.
Vazirlikning qayd etishicha, hozirgi asosiy maqsad aholi va ijtimoiy soha obyektlarini tabiiy gaz bilan uzluksiz ta’minlashdir. Mahalliy hokimiyatlar bilan kelishilgan holda, metan zapravkalari ish grafigi qayta ko‘rib chiqilmoqda.
Ayniqsa, Farg‘ona vodiysida gaz bosimiga qarab, shoxobchalar ish tartibi hududiy hokimliklar bilan birgalikda belgilanishi ta’kidlandi. Energetika vazirligi gaz bosimi pasaygan vaqtlarda avvalo turar joylar, jamoat transporti va ijtimoiy obyektlarni gaz bilan ta’minlash ustuvor vazifa ekanini ma’lum qildi.
Jamoat transportining uzluksiz ishlashi va aholining kundalik ehtiyojlarini qondirish muhim yo‘nalish bo‘lib qolmoqda. Metan zapravkalari ish tartibi gaz ta’minoti holati, bosim darajasi va iste’mol hajmlariga qarab muntazam ravishda o‘zgartiriladi.
Ushbu chora-tadbirlar gaz resurslaridan samarali foydalanish va energiya ta’minotini barqaror saqlash maqsadida amalga oshirilmoqda. Vazirlik cheklovlar vaqtinchalik ekanini ta’kidladi va tizimdagi gaz bosimini me’yorlashtirish bo‘yicha tegishli ishlar olib borilayotganini qayd etdi.
Eslatib o‘tamiz, 25-dekabr kuni Toshkent shahrida metan zapravkalardagi navbatlar sababli ayrim avtobuslar yo‘nalishdan chiqib ketgan edi.
