Xitoylik sayyohlar oqimi O‘zbekistonda sezilarli oshdi
Yangi yil bayramlari arafasida O‘zbekistonga tashrif buyurayotgan xitoylik sayyohlar soni sezilarli darajada oshdi. Bu haqda Zamin.uz xabar berdi.
Mutaxassislarning fikriga ko‘ra, ushbu o‘sishga joriy yil boshida Xitoy fuqarolari uchun vizasiz rejimning joriy etilishi muhim turtki bo‘ldi. Bu yangilik O‘zbekiston va Xitoy o‘rtasidagi turizm aloqalarini yanada rivojlantirishga xizmat qilmoqda.
Turizm qo‘mitasi Sinxua axborot agentligiga asoslanib bergan ma’lumotlarga ko‘ra, 1–3 yanvar kunlari Xitoydan O‘zbekistonga aviachiptalarni bron qilish ko‘rsatkichlari o‘tgan yilning shu davriga nisbatan ikki barobar oshgan. Ushbu ijobiy o‘zgarish vizasiz sayohat imkoniyati tufayli yuzaga kelgan bo‘lib, bu tartib sayohat qilish jarayonini soddalashtirdi va turistik byurokratik to‘siqlarni kamaytirdi.
Bundan tashqari, yaqinda Xitoyda yakunlangan “O‘zbekiston – turizm yili” doirasida mamlakatimizning boy madaniy merosi va sayyohlik salohiyati keng targ‘ib qilingani xitoylik sayyohlar orasida O‘zbekistonga bo‘lgan qiziqishni kuchaytirdi. Shuningdek, ikki davlat yirik shaharlarini bog‘laydigan to‘g‘ridan to‘g‘ri aviaqatnovlar sonining ko‘payishi ham sayohatchilar uchun qo‘shimcha qulaylik yaratdi.
Xitoylik mehmonlar asosan Samarqand, Buxoro va Xiva kabi tarixiy shaharlarni o‘z ichiga olgan an’anaviy turistik yo‘nalishlarga katta qiziqish bildirmoqda. Bu esa O‘zbekistonning xalqaro turizm bozoridagi mavqei tobora mustahkamlanib borayotganidan dalolat beradi.
