Quvada qadimiy shahar devorlari topildi
Farg‘ona vodiysida o‘zbek va xitoylik arxeologlar ishtirokida tashkil etilgan qo‘shma ekspeditsiya davomida qadimgi Quva shahar xarobalaridan noyob topilmalar aniqlandi. Bu haqda Zamin.uz xabar berdi.
Tadqiqotchilar shahar devorlarining ayrim bo‘laklarini aniqlashga muvaffaq bo‘ldi. Ushbu devorlar miloddan avvalgi III asrdan milodiy X asrgacha bo‘lgan davrga tegishli ekani ma’lum qilindi.
Bu haqda podrobno.uz xabar berdi. Arxeologlarning ta’kidlashicha, mazkur mudofaa inshootlari Parfiya va Davan davlatlari davridan boshlab, Somoniylar hukmronligi davrigacha bo‘lgan uzoq tarixiy davrda foydalanilgan.
Topilmalar umumiy maydoni 110 ming kvadrat metrni tashkil etadi va Buyuk ipak yo‘li bo‘ylab Sharq va G‘arb o‘rtasidagi madaniy aloqalarning rivojlanganini tasdiqlaydi. Devorlarning qurilish texnologiyalari turli davrlarda qanday o‘zgarganini o‘rganish orqali shahar me’morchiligidagi tarixiy bosqichlar va madaniy ta’sirlarni aniqlash imkoniyati mavjud.
Hozirgi kunda xarobalar hududida shahar darvozalari, saroylar, turar joylar, ko‘chalar va hunarmandchilik ustaxonalari izlari topilgan. Ekspeditsiya rahbari Lyu Binning so‘zlariga ko‘ra, bu topilmalar Quva qadimda mintaqadagi yirik savdo va ma’muriy markazlardan biri bo‘lganini tasdiqlaydi.
2026 yilda shahar saroy qismida tizimli qazish ishlari boshlanishi rejalashtirilgan. Bu tadqiqotlar Quvaning ichki rejalashtirilishini batafsil o‘rganish hamda uning tarixiy qiyofasini tiklashga yordam beradi.
