O‘zbekiston Janubi-Sharqiy Osiyodan turistlarni jalb etadi
O‘zbekiston 2026–2027 yillarda Malayziya va Indoneziyadan keladigan sayyohlar sonini 100 ming nafargacha oshirishni rejalashtirmoqda. Bu haqda Zamin.uz xabar berdi.
Bu maqsad "Umra Plyus" dasturi doirasida amalga oshiriladi. Ushbu dastur haqida kursiv.uz xabar berdi.
Rejaga ko‘ra, Malayziya va Indoneziyadan kelgan turistlar Toshkent, Samarqand va Buxoro shaharlariga sayohat qilish imkoniyatiga ega bo‘ladi. Ularni jalb qilish maqsadida Ramazon hayiti va Qurbon hayiti kabi diniy bayramlar doirasida tadbirlar o‘tkazilishi ko‘zda tutilgan.
Shuningdek, "Imom Buxoriy izidan" va "Ramazonni O‘zbekistonda o‘tkazing" kabi reklama kampaniyalari tashkil etiladi. Turistlarni olib kelgan turoperatorlarga har bir mehmon uchun 100 dollar miqdorida subsidiya ajratilishi belgilangan.
Bundan tashqari, mavsumdan tashqari davrlarda – 20 noyabrdan 20 fevralgacha va iyul oyida – tarixiy obidalarni tomosha qilish, mehmonxonalarda yashash hamda ovqatlanish xizmatlariga chegirmalar taklif etiladi. Reja doirasida 10 tagacha samolyotni jalb etish va yangi aviaqatnovlarni ochish ko‘zda tutilgan.
Jumladan, Kuala-Lumpur – Samarqand, Kuala-Lumpur – Buxoro – Jidda, Jakarta – Samarqand – Jidda va Jakarta – Buxoro – Jidda yo‘nalishlarida aviaqatnovlarni yo‘lga qo‘yish rejalashtirilmoqda.
