Yanvarda iliq kunlar o‘rnini sovuq egallaydi
Yanvar oyining o‘rtalarida respublika hududlarida ob-havo sezilarli darajada o‘zgarishi kutilmoqda. Bu haqda Zamin.uz xabar berdi.
Sinoptiklarning ma’lum qilishicha, 13–14-yanvar kunlari Turkmaniston hududidan kirib keladigan issiq havo oqimi ta’sirida ayrim hududlarda havo iliq bo‘ladi. Ayniqsa, janubiy viloyatlarda harorat +20 darajagacha ko‘tarilishi mumkin.
Bu davrda bahoriy kayfiyat hukm surishi ehtimoli bor. Biroq haftaning o‘rtalaridan boshlab ob-havo keskin o‘zgaradi.
15–16-yanvar kunlari Turkmaniston tomondan kirib keladigan siklon natijasida Qashqadaryo, Samarqand, Sirdaryo, Jizzax va Toshkent viloyatlarida kuchli yog‘ingarchilik kuzatilishi mumkin. Yog‘ingarchilik asosan yomg‘ir shaklida bo‘lib, ayrim hududlarda suv to‘planishi, hatto mahalliy suv toshqinlari sodir bo‘lishi ehtimoldan xoli emas.
Shu sababli, mutaxassislar aholiga ehtiyotkorlik choralarini ko‘rishni tavsiya etmoqda. Yanvarning uchinchi o‘n kunligidan boshlab esa sovuq havo hukm suradi.
21-yanvar kuni ko‘plab hududlarda harorat keskin pasayishi kutilmoqda. 22-yanvardan boshlab kunduzgi harorat ham nol darajadan past bo‘lishi mumkin.
Sinoptik ma’lumotlarga ko‘ra, oyning eng sovuq kunlari 25–26-yanvarga to‘g‘ri keladi. Toshkent shahrida tungi harorat -10 darajagacha tushishi mumkin.
Qoraqalpog‘istonning shimoliy hududlarida esa g‘ayritabiiy sovuqlar kuzatilishi kutilmoqda. Mutaxassislar ob-havodagi keskin o‘zgarishlarga tayyor turishni va safar yoki kundalik rejalarni tuzishda ehtiyotkor bo‘lishni tavsiya qilmoqda.
Manba: Zamin.uz
