O‘zbekistonda haftaning ikkinchi yarmida havo soviydi
“O‘zgidromet” xizmati 18-yanvargacha bo‘lgan ob-havo ma’lumotlarini e’lon qildi. Bu haqda Zamin.uz xabar berdi.
Unga ko‘ra, yaqin kunlarda O‘zbekiston hududida havo keskin o‘zgarishi kutilmoqda. Ayrim joylarda yomg‘ir va qor yog‘ishi mumkin.
Xususan, kechalari harorat pasayib, tumanli kunlar kuzatilishi ehtimoldan xoli emas. Qoraqalpog‘iston Respublikasi va Xorazm viloyatida 15–17-yanvar kunlari ayrim hududlarda yomg‘ir yoki qor yog‘ishi mumkin.
Kechasi harorat 2–7 daraja sovuqqacha tushadi, kunduzi esa havo iliqdan salqinga o‘tadi. Buxoro va Navoiy viloyatlarida ham ob-havo barqaror bo‘lmaydi.
Ushbu hududlarda 15–17-yanvar kunlari yog‘ingarchilik kuzatilishi mumkin. Kechalari harorat musbatdan manfiyga tushib, kunduzi 2–7 daraja iliq bo‘lishi kutilmoqda.
Toshkent, Sirdaryo, Jizzax va Samarqand viloyatlarida haftaning birinchi yarmi iliq o‘tadi. Ammo 15-yanvardan keyin havo soviy boshlaydi.
Ayrim joylarda yomg‘ir va qor yog‘ishi, shuningdek, tuman tushishi ehtimoli bor. Qashqadaryo va Surxondaryo viloyatlarida 16–17-yanvar kunlari qisqa muddatli yog‘ingarchilik bo‘lishi mumkin.
Bu hududlarda kunduzi harorat 5–10 daraja iliq bo‘lishi kutilmoqda. Andijon, Namangan va Farg‘ona viloyatlarida ham haftaning ikkinchi yarmida ob-havo o‘zgaradi.
Ayrim joylarda yomg‘ir va qor yog‘ishi ehtimoli mavjud. Kunduzgi harorat 2–7 daraja iliq atrofida bo‘ladi.
Tog‘li hududlarda esa havo yanada sovuq bo‘lib, 16–17-yanvar kunlari yog‘ingarchilik kuzatilishi mumkin. Kechasi harorat 7 daraja sovuqqacha pasayadi.
Mutaxassislarning ta’kidlashicha, yanvar oyining ikkinchi yarmida harorat bosqichma-bosqich pasayishi davom etadi. Uchinchi o‘n kunlikda shimoliy hududlarda tungi harorat 15–20 darajagacha sovushi mumkin.
Shu sababli fuqarolarga qishki sovuqqa tayyor turish tavsiya etiladi. Ma’lumot manbasi: zamin.uz.
