Afg‘oniston mutaxassislari O‘zbekistonda konchilik bo‘yicha malaka oshiradi
Afg‘oniston Tog‘-kon sanoati va neft vazirligining texnik delegatsiyasi O‘zbekistonga tashrif buyurdi. Bu haqda Zamin.uz xabar berdi.
Ushbu tashrifdan maqsad - afg‘on mutaxassislarining konchilik sohasidagi bilim va ko‘nikmalarini oshirishdir. O‘zbekiston tog‘-kon va geologiya sohasida boy tajribaga ega davlat sifatida ushbu yo‘nalishda qo‘shni davlat bilan hamkorlikni rivojlantirmoqda.
Afg‘oniston delegatsiyasi 28 kunlik malaka oshirish kursida ishtirok etadi. Kurs davomida ular zamonaviy texnologiyalar, konchilik jarayonlari va geologik tadqiqot metodlari bilan yaqindan tanishadilar.
Ushbu dastur “Uzbek Overseas Geology Company” homiyligida tashkil etilib, Geologiya fanlari universiteti qoshidagi “Tog‘-kon va geologiya sohasi xodimlari malakasini oshirish instituti”da o‘tkazilmoqda. Kursning asosiy mavzusi “Geologiya-qidiruv va konchilik sanoatida laboratoriya va analitik tadqiqotlar” bo‘lib, unda nazariy bilimlar bilan birga amaliy mashg‘ulotlar va laboratoriya tadqiqotlari ham o‘rin olgan.
Mazkur tashrif ikki davlat o‘rtasidagi tog‘-kon sohasidagi professional hamkorlikni mustahkamlashga, tajriba almashishga va malakali kadrlar tayyorlashga xizmat qiladi. Bu kabi o‘quv dasturlari ikki mamlakat o‘rtasida strategik aloqalarni rivojlantirishda muhim ahamiyat kasb etadi.
Manba: Zamin.uz
