2025-yilda ish joylarida 248 kishi halok bo‘ldi

2025-yil davomida O‘zbekistonda ish joylarida sodir bo‘lgan baxtsiz hodisalar oqibatida 248 nafar fuqaro halok bo‘ldi. Bu haqda Zamin.uz xabar berdi.

Kambag‘allikni qisqartirish va bandlik vazirligi ma’lumotlariga ko‘ra, yil davomida mamlakat bo‘ylab jami 849 ta mehnat faoliyati bilan bog‘liq baxtsiz hodisa qayd etilgan. Ushbu hodisalarning 50 tasi guruhiy tarzda sodir bo‘lgan bo‘lsa, 583 tasi og‘ir oqibatlarga olib kelgan, 216 ta holat esa o‘lim bilan yakunlangan.

Bu hodisalar natijasida 680 nafar fuqaro og‘ir tan jarohati olgan, 33 nafari esa yengil jarohatlangan. Eng ko‘p baxtsiz hodisalar qurilish sohasida qayd etilgan bo‘lib, bu sohada 234 ta holat aniqlangan.

Shuningdek, yengil sanoat sohasida 47 ta, transport sohasida esa 37 ta baxtsiz hodisa sodir bo‘lgan. Mutaxassislar aynan ushbu sohalarda mehnat xavfsizligini kuchaytirish zarurligini ta’kidlashmoqda.

Aniqlangan holatlar bo‘yicha mas’ul shaxslarga nisbatan qonunchilikda belgilangan choralar ko‘rilgan. Xususan, 432 nafar mansabdor shaxsga nisbatan jinoiy ish qo‘zg‘atilgan, 241 nafariga esa ma’muriy jarima qo‘llanilgan.

Mutasaddilar ish joylarida xavfsiz mehnat sharoitlarini yaratish inson hayoti va sog‘lig‘ini himoya qilishda muhim omil ekanini qayd etmoqda. Ma’lumot manbasi: one.uz.