Samarqand tumani tugatilib, shahar hududi kengaytiriladi
Oliy Majlis Qonunchilik palatasida O‘zbekiston Liberal-demokratik partiyasi fraksiyasi yig‘ilishida Samarqand viloyatining ma’muriy chegaralarini o‘zgartirish bo‘yicha qaror tasdiqlandi. Bu haqda Zamin.uz xabar berdi.
Ushbu qarorga muvofiq, Samarqand tumani alohida ma’muriy birlik sifatida tugatilib, uning hududi Samarqand shahriga qo‘shiladi. Natijada shaharning aholisi 604 mingdan 882 ming kishiga yetadi.
Shuningdek, zamonaviy arxitektura yechimlariga asoslangan turar-joy va noturar binolar qurilishi rejalashtirilmoqda. Bu o‘zgarishlar orqali aholining uy-joyga bo‘lgan ehtiyoji to‘liq qondirilishi ko‘zda tutilgan.
Fraksiya a’zosi Diyor Husanovning so‘zlariga ko‘ra, bu ma’muriy o‘zgarishlar Samarqand shahri hududini 11,8 ming gektardan 28,9 ming gektargacha kengaytiradi. Natijada yangi investitsiya va qurilish loyihalarini amalga oshirish uchun katta imkoniyatlar yaratiladi.
Shahar hududida turistik obyektlar, sport maydonlari, akvaparklar, dam olish bog‘lari va boshqa ko‘ngilochar maskanlar barpo etilishi rejalashtirilgan. Yangi yashil hududlar, xizmat ko‘rsatish markazlari va logistika infratuzilmalari ham tashkil etiladi.
Samarqandni «millionlik shahar»ga aylantirish g‘oyasi 2021-yilda rejalashtirilgan edi. Prezident Shavkat Mirziyoyev 2025-yil noyabr oyida viloyatga tashrifi davomida ushbu keng ko‘lamli ma’muriy-hududiy o‘zgarishlarni e’lon qilgan.
Ushbu islohotlar nafaqat shaharning aholi soni va infratuzilmasini rivojlantirishga, balki turizm salohiyatini oshirish va investitsiya muhitini yaxshilashga xizmat qiladi.
