O‘zbekiston armiyasi raqamli texnologiyalar bilan yangilanadi
O‘zbekiston Prezidenti Shavkat Mirziyoyev raisligida Xavfsizlik kengashining mamlakat mudofaa qobiliyatini tubdan yuksaltirishga bag‘ishlangan kengaytirilgan majlisi bo‘lib o‘tdi. Bu haqda Zamin.uz xabar berdi.
Unda davlat rahbari zamonaviy xavf-xatarlarga qarshi samarali kurashish uchun qurolli kuchlarni raqamli texnologiyalar va sun’iy intellekt asosida yangilash zarurligini ta’kidladi. Majlisda bugungi mintaqaviy va global xavfsizlik muammolari, xalqaro huquqning zaiflashayotgani, urush strategiyalarining o‘zgarib borayotgani muhokama qilindi.
Prezident zamonaviy urushlarda g‘alaba nafaqat askarlar soniga yoki harbiy texnika ko‘pligiga bog‘liq, balki sun’iy intellekt, masofadan boshqariladigan tizimlar va kibertexnologiyalar orqali ta’minlanishini aytdi. Shu maqsadda yangi xavfsizlik konsepsiyasi va mudofaa doktrinasi ishlab chiqilishi belgilandi.
Ushbu hujjatlarda O‘zbekistonning harbiy bloklarga qo‘shilmaslik maqomi saqlab qolinadi. Yig‘ilishda armiya tizimini yoshlar uchun rivojlanish maydoniga aylantirish bo‘yicha qator tashabbuslar ilgari surildi.
Xususan, askarlar qisqa muddatli kurslar orqali kasb o‘rganadi va sertifikat oladi. Har yili 5 ming askarga IT va sun’iy intellekt bo‘yicha ta’lim beriladi.
Xizmat davomida oliygohlarga kirish, foizsiz ta’lim kreditlari olish va davlat xizmatiga kirishda imtiyozlar berish imkoniyatlari taqdim etiladi. Shuningdek, sobiq askarlarga tadbirkorlik kreditlarini qisman davlat tomonidan qoplash mexanizmi joriy etiladi.
Prezident harbiy xizmatchilarni ijtimoiy qo‘llab-quvvatlash masalasiga ham alohida e’tibor qaratdi. 1-apreldan boshlab harbiylar va ularning oila a’zolari uchun maosh va pensiya miqdorlari oshiriladi, uy-joy qurilishi kengaytiriladi.
Shuningdek, xizmat ko‘rsatgan yillarga qarab pensiya hisoblash tizimi takomillashtiriladi. Harbiylarning ma’naviy rivojlanishi uchun harbiy qismlarga bir million nusxa badiiy kitob yetkazilishi va kitobxonlik tanlovlari o‘tkazilishi rejalashtirilgan.
Sport sohasida esa dron va robot texnologiyalari bo‘yicha turnirlar tashkil etiladi. Prezident yig‘ilish yakunida barcha vatan himoyachilarini Qurolli Kuchlar tashkil etilganining 34-yilligi bilan tabriklab, ularning fidoyiligi va jasorati xalqimiz uchun faxr ekanini qayd etdi.
U tinchlik va barqarorlikni saqlashda O‘zbekiston armiyasining ahamiyatini alohida ta’kidladi. Manba: Zamin.uz
