Harbiy xizmatni o‘tagan yoshlarga yangi imtiyozlar beriladi
O‘zbekistonda muddatli harbiy xizmatni o‘tagan yoshlar uchun bir qator yangi imkoniyatlar joriy etilmoqda. Bu haqda Zamin.uz xabar berdi.
Agar bunday yoshlar oliy ta’lim muassasalarida o‘qishni istasa, xorijiy til va boshqa fanlardan sertifikat olish xarajatlari davlat tomonidan qoplab beriladi. Shuningdek, ular kontrakt asosida o‘qishga kirgan taqdirda, foizsiz ta’lim krediti olish imkoniyatiga ega bo‘ladilar.
Bu haqda prezident Shavkat Mirziyoyev Xavfsizlik kengashining yig‘ilishida ma’lum qildi. Prezidentning ta’kidlashicha, muddatli harbiy xizmatni o‘tayotgan askarlar uchun harbiy qismning o‘zida oliy ta’lim muassasalariga kirish imtihonlarini topshirish imkoniyati yaratiladi.
Agar ular test sinovlaridan muvaffaqiyatli o‘tsa, talabalikka qabul qilinadi va xizmat muddati tugashi bilan o‘qishni boshlaydi. Bundan tashqari, armiyadan qaytgan va davlat tashkilotlariga ishga kirmoqchi bo‘lgan yoshlar uchun Boshqaruv samaradorligi agentligi tomonidan o‘tkaziladigan test ballariga 10 foizlik imtiyoz beriladi.
Xususiy sektorda ishlashni reja qilganlarga esa kasb-hunar o‘rganish yoki sertifikat olish xarajatlari davlat tomonidan qoplab beriladi. Prezident Mirziyoyevning ta’kidlashicha, muddatli harbiy xizmatni o‘tash yoshlar uchun kelajakda muvaffaqiyatga erishish yo‘liga aylanishi lozim.
Manba: One.uz.
