Prezident Toshkent viloyatidagi yangi harbiy poligonda bo‘ldi

O‘zbekiston Respublikasi Prezidenti, qurolli kuchlar Oliy bosh qo‘mondoni Shavkat Mirziyoyev Toshkent viloyatidagi Maxsus operatsiyalar kuchlari uchun tashkil etilgan yangi harbiy poligon bilan tanishdi. Bu haqda Zamin.uz xabar berdi.

Ushbu poligon zamonaviy xalqaro standartlarga mos ravishda qurilgan bo‘lib, maxsus bo‘linmalarni tayyorlashda samaradorlikni oshirishga yo‘naltirilgan. Prezident matbuot xizmatining ma’lum qilishicha, so‘nggi yillarda Mudofaa vazirligi tarkibidagi barcha dala o‘quv maydonlari, harbiy qismlar va muassasalar modernizatsiya qilinib, ularning faoliyati zamonaviy texnologiyalar asosida tashkil etilmoqda.

Yangi poligon ham ushbu islohotlarning mantiqiy davomidir. Poligonda harbiy xizmatchilarning jangovar ko‘nikmalarini oshirish, ularni ma’naviy-ruhiy jihatdan mustahkamlash va tayyorgarlik mashg‘ulotlarini yuqori samaradorlik bilan o‘tkazish uchun zarur sharoitlar yaratilgan.

Davlat rahbari tashrif davomida jangovar va maxsus tayyorgarlik mashg‘ulotlarining yangi usullari bilan tanishdi. U harbiy bo‘linmalarning o‘zaro muvofiqlashgan harakatlarini kuzatib, jangovar imkoniyatlari va boshqaruv tizimlarining zamonaviy raqamli texnologiyalar asosida tashkil etilganligini baholadi.

Turli jangovar operatsiyalar jarayonida uchuvchisiz uchish apparatlaridan, artilleriya va aviatsiya kuchlaridan samarali foydalanish bo‘yicha amaliy mashqlar namoyish etildi. Prezident kichik komandirlarning mustaqil qaror qabul qilish ko‘nikmalari, jang maydonida zamonaviy qurol-yarog‘ va texnikani samarali qo‘llash bo‘yicha harbiy xizmatchilarning kasbiy mahoratini yuqori baholadi.

Shuningdek, qurolli kuchlarning tayyorgarlik darajasini oshirish, xalq va armiya birdamligini ta’minlash hamda yoshlarni vatanparvarlik ruhida tarbiyalash muhimligi ta’kidlandi. Manba: Zamin.uz