Mudofaa doktrinasi va xavfsizlik konsepsiyasi yangilanadi

O‘zbekiston Respublikasi Prezidenti Shavkat Mirziyoyev mamlakatning Mudofaa doktrinasi va Milliy xavfsizlik konsepsiyasini yangilash zarurligini ta’kidladi. Bu haqda Zamin.uz xabar berdi.

Davlat rahbari mavjud hujjatlar zamonaviy talab va xavflarga mos emasligini qayd etdi. Ma’lum bo‘lishicha, Mudofaa doktrinasi bundan sakkiz yil avval qabul qilingan, Milliy xavfsizlik konsepsiyasi esa 1997-yildan beri yangilanmagan.

Hozirgi zamonda xavfsizlikka oid tahdidlar tez o‘zgarib borayotgani sababli hujjatlarni qayta ko‘rib chiqish va yangicha yondashuvlarni ishlab chiqish muhim ahamiyatga ega. Yangi Mudofaa doktrinasi O‘zbekistonning harbiy bloklarga qo‘shilmaslik maqomini saqlab qolish tamoyiliga asoslanishi kerak.

Shuningdek, u ko‘p tomonlama diplomatiyani rivojlantirish, yuqori texnologiyalarni joriy qilish, harbiy mustaqillikni ta’minlash va mintaqaviy barqarorlikni mustahkamlashga yo‘naltirilishi lozim. Prezidentning ta’kidlashicha, ushbu hujjat armiyani zamonaviylashtirish hamda ilg‘or harbiy texnologiyalarni qo‘llash uchun muhim asos bo‘ladi.

Manba: Zamin.uz