Xorijiy til o‘qituvchilari uchun sertifikat muddati uzaytirildi
Maktabgacha va maktab ta’limi vazirligining ma’lum qilishicha, xorijiy til fanidan dars beruvchi o‘qituvchilarga kamida B2 darajadagi milliy yoki xalqaro sertifikat olish muddati 2026/2027-o‘quv yilining boshlanishigacha uzaytirildi. Bu haqda Zamin.uz xabar berdi.
Eslatib o‘tish joiz, 2021-yilda hukumat qarori bilan xorijiy til o‘qituvchilarining sertifikatga ega bo‘lishi majburiy qilib belgilangan edi. Dastlab ularga ushbu talabni bajarish uchun 3 yil muddat berilgan.
Shu bilan birga, sertifikatga ega bo‘lgan o‘qituvchilar qo‘shimcha ustamalar bilan rag‘batlantirilishi ham nazarda tutilgan. Biroq, 2024-yil va 2025-yillar davomida ko‘plab o‘qituvchilar ushbu talabni bajarishga ulgurmaganliklarini bildirib, e’tiroz bildirishgan.
Shundan so‘ng hukumat muddatni qayta ko‘rib chiqib, uni bir necha bor uzaytirdi. So‘nggi qarorga ko‘ra, o‘qituvchilar 2026-yilning sentyabr oyigacha sertifikat olish imkoniyatiga ega bo‘ladilar.
Shunday qilib, 2021-yildan boshlab xorijiy til o‘qituvchilariga B2 darajadagi sertifikat olish uchun jami 5 yil muddat berildi. Vazirlik o‘qituvchilarga ushbu imkoniyatdan samarali foydalanishni tavsiya etmoqda.
Ma’lumot manbasi: one.uz.
