Chiqindilar boshqaruvi: 2025-yil natijalari e’lon qilindi

O‘zbekiston Ekologiya qo‘mitasi huzuridagi Chiqindilarni boshqarish va sirkulyar iqtisodiyotni rivojlantirish agentligi 2025-yilda amalga oshirilgan ishlar bo‘yicha brifing o‘tkazdi. Bu haqda Zamin.uz xabar berdi.

Unda chiqindilarni boshqarish, sanitariya xizmatlarini kengaytirish, infratuzilmani rivojlantirish va sohani raqamlashtirish bo‘yicha asosiy natijalar e’lon qilindi. Ma’lumotlarga ko‘ra, 2025-yilda mamlakat bo‘ylab 15,1 million tonna maishiy chiqindi yig‘ilgan.

Respublikadagi 9 452 ta mahalladan 8 105 tasida, ya’ni 23,9 million aholi sanitariya tozalash xizmatlari bilan qamrab olingan. Aholi tomonidan ushbu xizmatlar uchun 1 trillion 304 milliard so‘m to‘lov qilingan, debitor qarzdorlik esa 622,7 milliard so‘mni tashkil etgan.

Shuningdek, ko‘rsatilmagan xizmatlar uchun hisoblangan 211,9 milliard so‘mlik noreal qarzdorlik elektron tizimdan chiqarib tashlangan. Soha shaffofligini ta’minlash maqsadida “Toza Makon” yagona elektron billing tizimi joriy etilgan.

Infratuzilmani rivojlantirish doirasida 6 hududda ekosanoat zonalari va 11 hududda 14 ta qayta yuklash punktlarini tashkil etish ishlari olib borilmoqda. Andijon, Qashqadaryo, Namangan, Samarqand, Toshkent va Farg‘ona viloyatlarida chiqindilarni termik usulda qayta ishlab, elektr energiyasi ishlab chiqaruvchi zavodlar qurilmoqda.

Toshkent shahri, Samarqand va Buxoroda tibbiyot chiqindilarini yoqib, issiqlik olish loyihalari amalga oshirilmoqda. Sanitar tozalash korxonalariga 79 ta chiqindi tashish texnikasi va 220 ta konteyner yetkazib berilgan.

3 230 ta maxsus texnikaga GPS o‘rnatilib, transport harakati va xizmat sifati ustidan nazorat yo‘lga qo‘yilgan. Ekologik talablarga javob bermagan, umumiy maydoni 100 gektarga yaqin bo‘lgan 23 ta chiqindi poligonining faoliyati to‘xtatilgan.

Shu bilan birga, 21 mingdan oshiq murojaatlar ko‘rib chiqilib, tegishli choralar ko‘rilgan. Manba: one.uz.