Voyaga yetmaganlarga zo‘ravonlik uchun jazolar kuchaytiriladi
Farg‘ona viloyati, Uchko‘prik tumanida 14 yoshli qizning bir necha shaxs tomonidan jinsiy zo‘ravonlikka uchragani haqida ijtimoiy tarmoqlarda xabarlar tarqaldi. Bu haqda Zamin.uz xabar berdi.
Ushbu holat keng jamoatchilik e’tiborini tortdi va bu masala yuzasidan munosabatlar bildirildi. Oliy Majlis Qonunchilik palatasi deputati, «Milliy tiklanish» fraksiyasi a’zosi Dilnoza Azizova bu kabi jinoyatlarning oldini olish bo‘yicha bir qator takliflarni ilgari surdi.
U bolalarga nisbatan jinsiy zo‘ravonlik va qiynoqlar bo‘yicha qat’iy choralar ko‘rish zarurligini ta’kidladi. Deputatning takliflariga ko‘ra, voyaga yetmaganlarga nisbatan jinsiy jinoyatlar uchun jazoni keskin kuchaytirish lozim.
Shuningdek, bolalarga qarshi jinoyat sodir etgan shaxslar uchun ochiq va jamoatchilik nazoratidagi reyestr joriy etilishi taklif qilindi. Bundan tashqari, maktab, mahalla va oila darajasida bolalarni himoya qilishga qaratilgan majburiy profilaktik tizimni shakllantirish zarurligi qayd etildi.
Jabrlangan bolalarga davlat hisobidan uzluksiz psixologik va huquqiy yordam ko‘rsatish mexanizmini mustahkamlash masalasi ham muhimligi ta’kidlandi. Deputatning fikriga ko‘ra, bu kabi choralar bolalarni himoya qilish va jinoyatlarning oldini olishga xizmat qiladi.
Manba: one.uz
