O‘zbekistonda eng kitobxon xodimlar mukofotlanadi
O‘zbekistonda barcha vazirlik va idoralarda eng ko‘p kitob o‘qigan xodimlar rag‘batlantiriladi. Bu haqda Zamin.uz xabar berdi.
Prezident qarori asosida, tanlov natijalariga ko‘ra, bunday xodimlarga bir oylik ish haqi miqdorida mukofot beriladi. Ushbu chora-tadbirlar “Kitobxonlik madaniyatini rivojlantirish va aholi o‘rtasida kitob o‘qishga qiziqishni oshirish” dasturi doirasida amalga oshirilmoqda.
Qarorga muvofiq, 2026 yil 1 aprelga qadar barcha vazirlik va idoralarda “Kitob burchagi” tashkil etilishi belgilangan. Bundan tashqari, xodimlar uchun har oy “Kitob o‘qish soati” joriy qilinadi va ichki reyting tizimi yo‘lga qo‘yiladi.
Shuningdek, 2026 yil 1 martga qadar kasbiy faoliyatga oid tavsiya etilgan adabiyotlar ro‘yxati tuziladi. Har yili kamida uchta xorijiy kasbiy adabiyot o‘zbek tiliga tarjima qilinib, ularni izohlar va misollar bilan boyitish rejalashtirilgan.
Yoshlar va talabalar ham rag‘batdan chetda qolmaydi. Eng ko‘p kitob o‘qigan 100 nafar o‘quvchi va talabalarga 10,3 million so‘m miqdorida mukofot beriladi.
Bundan tashqari, Yoshlar ishlari agentligi huzurida Kitobxonlik madaniyatini rivojlantirish jamg‘armasi tashkil etiladi. Umumta’lim maktablarida “Jadidlar izidan” kitobxonlik klublari faoliyat olib boradi.
Mazkur qarorning asosiy maqsadi 2026–2030 yillarda aholi o‘rtasida kitobxonlikni rivojlantirish va har bir kishining yiliga o‘rtacha 10 ta kitob o‘qishini ta’minlashdan iborat. Jamg‘arma mablag‘lari yosh yozuvchilarni qo‘llab-quvvatlash, bolalar adabiyotini rivojlantirish va iste’dodli mualliflarni rag‘batlantirishga yo‘naltiriladi.
