Mahkumlar kitob o‘qib, jazoni qisqartirishi mumkin
O‘zbekistonda mahkumlarning ma’naviy rivojlanishini qo‘llab-quvvatlash maqsadida yangi tartib joriy etilishi rejalashtirilmoqda. Bu haqda Zamin.uz xabar berdi.
Ushbu tartibga ko‘ra, mahkumlar tomonidan kitob o‘qish jazoni yengillashtirishga asos bo‘lishi mumkin. Tashabbusga muvofiq, mahkumlar o‘qigan kitoblar maxsus komissiya tomonidan baholanadi.
Komissiya o‘z xulosasini berganidan so‘ng, bu ma’lumot sudga taqdim etiladi. Agar komissiya xulosasi ijobiy bo‘lsa, sud mahkumning jazo muddatini yiliga 30 kungacha qisqartirish masalasini ko‘rib chiqishi mumkin.
Mazkur imtiyoz har bir mahkum uchun alohida tartibda qo‘llanadi. Bunda mahkumning xulq-atvori, intizomi va ijtimoiy xavfsizligi kabi omillar inobatga olinadi.
Ushbu tashabbus mahkumlarning kitob o‘qishga bo‘lgan qiziqishini oshirish va ularning ma’naviy rivojiga ijobiy ta’sir ko‘rsatish uchun mo‘ljallangan. Manba: zamin.uz
