Temiryo‘l chiptalari narxi 2026-yildan oshadi
O‘zbekistonda temiryo‘l orqali yo‘lovchi tashish xizmatlari narxlari oshiriladi. Bu haqda Zamin.uz xabar berdi.
«O‘zbekiston temir yo‘llari» aksiyadorlik jamiyati ma’lumotiga ko‘ra, 2026-yil 1-fevraldan boshlab ayrim poyezdlar, jumladan, yuqori tezlikda harakatlanuvchi «Afrosiyob» elektro-poyezdlari uchun chipta narxlari 15 foizga qimmatlashadi. Mazkur qaror texnik xizmat ko‘rsatish xarajatlarining ortishi, ehtiyot qismlar narxining ko‘tarilishi, elektr energiyasi va ekspluatatsiya xarajatlarining oshishi bilan bog‘liq.
Shuningdek, poyezdlarning harakat xavfsizligini ta’minlash, xizmat sifatini xalqaro talablar darajasida saqlab qolish va infratuzilmani muntazam ravishda yangilab borish zarurati ham ushbu o‘zgarishga sabab bo‘lgan. Yangilangan tariflarga muvofiq, «Afrosiyob» poyezdlarida quyidagi yo‘nalishlar bo‘yicha chipta narxlari belgilangan: Toshkent — Buxoro yo‘nalishida VIP sinf uchun 1 138 000 so‘m, biznes sinf uchun 760 000 so‘m, ekonom sinf uchun esa 509 000 so‘m.
Toshkent — Qarshi yo‘nalishida VIP sinf narxi 976 000 so‘m, biznes sinf 642 000 so‘m, ekonom sinf esa 429 000 so‘mni tashkil etadi. Toshkent — Samarqand yo‘nalishida esa VIP sinf uchun 709 000 so‘m, biznes sinf uchun 455 000 so‘m va ekonom sinf uchun 311 000 so‘m belgilangan.
Bundan tashqari, «Sharq», «Nasaf» va «O‘zbekiston» yo‘lovchi poyezdlari uchun ham chipta narxlari 15 foizga oshirilgan. Ushbu ma’lumotlar «O‘zbekiston temir yo‘llari» AJ rasmiy xabariga asoslangan.
