Dam olish kunlari ko‘pchilik hududlarda qor yog‘adi

O‘zgidromet 16–18 yanvar kunlari uchun ob-havo prognozini e’lon qildi. Bu haqda Zamin.uz xabar berdi.

Ushbu ma’lumotlarga ko‘ra, dam olish kunlari respublika hududlarining ko‘pchiligida yog‘ingarchilik, asosan qor shaklida kuzatiladi. Bugun, 16 yanvar kuni kunduzi va shanbaga o‘tar kechasi mamlakatning katta qismida yomg‘ir yog‘ib, keyinchalik qorga aylanishi kutilmoqda.

Farg‘ona vodiysi viloyatlarida esa yog‘ingarchilik kechqurun boshlanishi ehtimoli bor. 17 yanvar, shanba kuni ob-havo nisbatan barqaror bo‘ladi.

Ayrim hududlarda qor yog‘ishi mumkin, ammo u kuchli bo‘lmaydi. Qoraqalpog‘iston Respublikasi va Xorazm viloyatida esa yog‘ingarchilik kutilmaydi.

18 yanvar, yakshanba kuni mamlakatning aksar hududlarida yog‘ingarchilik bo‘lmaydi. Faqat kechasi va ertalab Navoiy, Toshkent, Sirdaryo va Farg‘ona vodiysi viloyatlarida ayrim joylarda biroz qor yog‘ishi mumkin.

Harorat bugun kunduzi 5–8 daraja iliq bo‘lsa, dam olish kunlari 0–5 daraja iliq atrofida bo‘ladi. Kechalari esa harorat 3 daraja sovuqdan 2 daraja iliqqacha tushishi mumkin.

Ayrim joylarda tuman tushishi kutilmoqda. Shamol tezligi 7–12 m/s bo‘lib, bugun ba’zi joylarda 13–18 m/s gacha kuchayishi ehtimoli bor.

Tog‘li hududlarda vaqt-vaqti bilan qor yog‘adi, ayrim joylarda esa kuchli bo‘lishi mumkin. Qor ko‘chishi xavfi saqlanib turadi.

Toshkent shahrida bugun yomg‘ir yog‘ib, kechqurun qorga aylanishi mumkin. Harorat 6–8 daraja iliq bo‘lishi kutilmoqda.

Shanba kuni kechasi va ertalab yomg‘ir va qor yog‘ishi, tuman tushishi ehtimoli bor. Yakshanba kuni ertalab biroz qor yog‘ishi mumkin, biroq kunduzi yog‘ingarchilik kutilmaydi.

Manba: O‘zgidromet.