Nukusga 12 ta elektrobus olib kelindi

Nukus shahrida jamoat transportini modernizatsiya qilish va aholiga xizmat ko‘rsatish sifatini oshirish maqsadida Xitoydan elektrobuslar olib kelindi. Bu haqda Zamin.uz xabar berdi.

Rasmiy ma’lumotlarga ko‘ra, bu loyihaga 24 milliard so‘m mablag‘ ajratilib, shahar uchun 12 ta elektrobus xarid qilindi. Prezident Shavkat Mirziyoyev tashabbusi bilan Nukus shahriga jami 200 ta avtobus olib kelish rejalashtirilgan.

Hozirda bu yo‘nalishda zarur chora-tadbirlar amalga oshirilmoqda. Transport infratuzilmasini rivojlantirish bo‘yicha ishlar davom etayotgani va elektrobuslar bosqichma-bosqich yetkazib berilayotgani ma’lum qilindi.

Bundan tashqari, “Sapsan Trans Nukus” korxonasi ham shahar transport tizimini yaxshilash uchun faoliyat olib bormoqda. Ushbu korxona Nukusda 200 ta avtobus sig‘imiga ega zamonaviy avtobus parkini qurish ishlarini amalga oshirmoqda.

Yangi elektrobuslarning keltirilishi ekologik toza transport ulushini oshirishi va yo‘lovchilarga qulayroq shart-sharoit yaratishi kutilmoqda. Bu esa nafaqat shahar aholisi uchun qulaylik, balki atrof-muhitni muhofaza qilishga ham xizmat qiladi.

Manba: zamin.uz