Toshkent Markaziy Osiyodagi eng xavfsiz shahar deb topildi
Toshkent shahri Markaziy Osiyodagi eng xavfsiz shahar sifatida e’tirof etildi. Bu haqda Zamin.uz xabar berdi.
Bu haqda Numbeo xalqaro analitik portalining 2025 yil yakunlari bo‘yicha tuzgan xavfsizlik reytingida ma’lum qilingan. Ushbu reyting natijalariga ko‘ra, Toshkent mintaqadagi barcha yirik shaharlarni ortda qoldirib, jahon miqyosida 51-o‘rinni egalladi.
Xususan, Toshkent xavfsizlik indeksi bo‘yicha Qozog‘istonning Ostona (81-o‘rin) va Olmaota (195-o‘rin) shaharlaridan yuqori o‘rinni egalladi. Shuningdek, u MDH davlatlari orasida ham yetakchi bo‘lib, global reytingning dastlabki 100 taligiga kirgan to‘qqizta MDH shaharlari ichida birinchi o‘rinni egalladi.
Reytingda Rossiyaning bir qator yirik shaharlari ham yuqori o‘rinlarni band etgan. Masalan, Nijniy Novgorod 56-o‘rin, Qozon 72-o‘rin, Kaliningrad 78-o‘rin, Moskva esa 99-o‘rinni egallagan.
Dunyo miqyosida esa Yaqin Sharq shaharlari xavfsizlik bo‘yicha yetakchilikni saqlab qolgan. Eng xavfsiz uchlikka Abu-Dabi, Doha va Dubay shaharlari kirgan.
Shuningdek, Taypey, Sharja, Manama, Maskat, Gaaga, Myunxen va Trondxaym shaharlari ham eng xavfsiz o‘nlik orasida qayd etilgan. Numbeo mutaxassislarining ta’kidlashicha, xavfsizlik indeksi faqat jinoyatchilik darajasiga asoslanmaydi.
U shuningdek, huquqni muhofaza qilish organlarining faoliyati, jamoat tartibi, shahar infratuzilmasining rivojlanishi hamda aholi va sayyohlarning shaxsiy fikrlariga asoslanadi. Bu yondashuv shaharda yashash sifati haqida kengroq va xolis tasavvur hosil qilish imkonini beradi.
