Yanvar oxirida sovuq kuchayishi kutilmoqda
“O‘zgidromet” xizmati 18–25 yanvar kunlariga mo‘ljallangan ob-havo ma’lumotlarini e’lon qildi. Bu haqda Zamin.uz xabar berdi.
Prognozga ko‘ra, yangi hafta boshida mamlakatning ayrim hududlarida yog‘ingarchilik kuzatilishi, asosan qor yog‘ishi kutilmoqda. Qoraqalpog‘iston Respublikasi va Xorazm viloyatida ob-havo asosan yog‘ingarchiliksiz bo‘ladi, biroq 21 yanvar kuni ayrim hududlarda qor yog‘ishi va tuman tushishi ehtimoli mavjud.
Havo harorati kechalari −5…−13 darajagacha pasayishi, kunduzi esa −6 dan +3 darajagacha iliqlashishi mumkin. Buxoro va Navoiy viloyatlarida ob-havo o‘zgaruvchan bo‘lib, 21 va 25 yanvar kunlari ayrim joylarda qor yog‘ishi ehtimoli bor.
Kechalari harorat −8 darajagacha pasayishi, kunduzi esa 0…+5 daraja atrofida iliq bo‘lishi kutilmoqda. Toshkent, Sirdaryo, Jizzax va Samarqand viloyatlarida 21 yanvar kuni ba’zi joylarda yomg‘ir yoki qor yog‘ishi mumkin.
Boshqa kunlari ob-havo asosan quruq va salqin bo‘ladi. Shu bilan birga, tuman tushishi ehtimoli saqlanib qoladi.
Qashqadaryo va Surxondaryo viloyatlarida 21–22 yanvar kunlari qisqa muddatli yog‘ingarchilik kuzatilishi mumkin. Keyingi kunlarda esa barqaror va nisbatan iliq ob-havo bo‘lishi kutilmoqda.
Andijon, Namangan va Farg‘ona vodiysida 18 yanvar kuni ayrim joylarda biroz qor yog‘ishi mumkin. So‘nggi kunlarda yog‘ingarchilik kamayib, havo salqinlashishi kuzatiladi.
Tog‘oldi va tog‘li hududlarda vaqti-vaqti bilan qor yog‘ishi kutilmoqda. 18–19 yanvar kunlari ayrim hududlarda qor ko‘chishi xavfi bor.
Mutaxassislarning ma’lum qilishicha, yanvar oyining ikkinchi yarmida havo harorati asta-sekin pasayib boradi. Oy oxirida respublikaning shimoliy hududlarida kuchli sovuqlar kuzatilishi mumkin.
Manba: O‘zgidromet ma’lumotlari.
