Yanvarda sovuq kuchayadi, qor va yomg‘ir yog‘adi

“O‘zgidromet” xizmati 19—23 yanvar kunlariga mo‘ljallangan ob-havo ma’lumotlarini taqdim etdi. Bu haqda Zamin.uz xabar berdi.

Ushbu prognozga ko‘ra, 19 yanvar kuni faqat Navoiy viloyatida va ertalab Qoraqalpog‘iston Respublikasi hamda Xorazm viloyatida biroz qor yog‘ishi kutilmoqda. 20 yanvar kuni respublikaning janubiy-g‘arbiy hududlarida kechqurun yomg‘ir yoki qor yog‘ishi mumkin.

21—23 yanvar kunlari esa mamlakatning ko‘plab hududlarida vaqti-vaqti bilan yog‘ingarchilik (yomg‘ir va qor) kuzatiladi. Haftaning birinchi yarmida havo harorati kechalari 3 daraja sovuqdan 2 daraja iliqqacha, kunduzi esa 3—8 daraja iliq bo‘lishi kutilmoqda.

Ikkinchi yarmidan boshlab harorat asta-sekin pasayadi. Kechalari 2—7 daraja sovuqqacha, kunduzi esa 2 daraja sovuqdan 3 daraja iliqqacha tushishi mumkin.

Qoraqalpog‘istonda hafta davomida kechalari harorat 8—13 daraja sovuq, kunduzi esa 0—5 daraja sovuq atrofida bo‘ladi. 23 yanvarga kelib, kunduzi havo 3 daraja iliqqacha isishi mumkin.

Ayrim hududlarda tuman tushishi ehtimoli bor. 21—22 yanvar kunlari ba’zi joylarda shamol tezligi 13—18 metr/sekundgacha kuchayishi kutilmoqda.

Tog‘li hududlarda vaqti-vaqti bilan qor yog‘ib, qor ko‘chishi xavfi yuzaga kelishi mumkin. Toshkent shahrida 19—21 yanvar kunlari yog‘ingarchilik kutilmaydi.

Havo kechalari 2 daraja sovuqdan 1 daraja iliqqacha, kunduzi esa 3—9 daraja iliq bo‘ladi. 22—23 yanvar kunlari esa vaqti-vaqti bilan yomg‘ir yoki qor yog‘ishi ehtimoli bor.

22 yanvarda harorat kunduzi 0—2 daraja iliq, 23 yanvarda esa kechasi 3—6 daraja sovuq, kunduzi esa 0 daraja atrofida bo‘lishi kutilmoqda. Kechalari va ertalab tuman tushishi ehtimoli mavjud.

Ma’lumot manbasi: “O‘zgidromet”.