Sun’iy intellekt orqali ma’lumotlarni noqonuniy tarqatish taqiqlandi
O‘zbekistonda sun’iy intellekt yordamida shaxsiy ma’lumotlarni noqonuniy qayta ishlash va tarqatish uchun javobgarlik kuchaytirildi. Bu haqda Zamin.uz xabar berdi.
Ushbu qonunbuzarlik sodir etilgan taqdirda, jinoyatda qo‘llangan vositalar, masalan, telefon, kompyuter, server yoki boshqa texnik qurilmalar musodara qilinadi. Shuningdek, bu holat uchun yirik miqdorda jarima belgilangan.
Qonunchilikka kiritilgan o‘zgartirishlar “Axborotlashtirish to‘g‘risida”gi Qonun doirasida amalga oshirildi. Bu o‘zgarishlar, bir tomondan, sun’iy intellekt texnologiyalaridan foydalanish tartibini belgilashga, ikkinchi tomondan esa ushbu sohada vakolatli davlat organining vazifalari va huquqlarini aniqlashtirishga qaratilgan.
Yangi o‘zgartirishlarga ko‘ra, sun’iy intellekt tushunchasiga aniq ta’rif berildi. U inson bilim va ko‘nikmalariga taqlid qiluvchi, mustaqil o‘qish, yechim topish va aniq vazifalarni bajarishda inson aqliy faoliyatiga yaqin natijalarni taqdim etuvchi texnologik yechimlar majmuasi sifatida qaraladi.
Shu bilan birga, inson huquq va erkinliklariga ta’sir qiluvchi qarorlar qabul qilishda faqat sun’iy intellekt xulosasiga tayanish taqiqlangan. Eng ko‘p muhokama qilinayotgan qism bu ma’muriy javobgarlik masalasi.
Endilikda sun’iy intellekt yordamida shaxsiy ma’lumotlarni noqonuniy qayta ishlash yoki ularni OAV, internet yoki telekommunikatsiya tarmoqlari orqali tarqatish uchun jarima miqdori BHMning 50 baravaridan 100 baravarigacha bo‘lishi mumkin. Bu esa 41,2 million so‘mgacha yetadi.
Mazkur qonun rasmiy e’lon qilingan kundan boshlab kuchga kirdi. Shu sababli, shaxsiy ma’lumotlar bilan ishlaydigan barcha soha vakillari — xususan, kontent yaratuvchilar, reklama, SMM, media va IT bilan shug‘ullanuvchilar — o‘z faoliyatini qonun talablariga muvofiq qayta ko‘rib chiqishlari lozim.
