Toshkentda sovuq havo: yo‘llarda ehtiyotkorlik zarur
Toshkent shahar Yo‘l harakati xavfsizligi boshqarmasi poytaxt aholisi va yo‘l harakati ishtirokchilariga muhim ogohlantirish berdi. Bu haqda Zamin.uz xabar berdi.
Ma’lum qilinishicha, shahar hududida qorli va sovuq ob-havo kuzatilayotgani sababli yo‘llarda xavfsizlikni ta’minlash hamda noxush hodisalarning oldini olish uchun ayrim qoidalarga qat’iy rioya qilish zarur. Rasmiy murojaatda haydovchilardan yo‘l harakati qoidalariga qat’iy amal qilish, oraliq masofani saqlash va tezlikni belgilangan me’yordan oshirmaslik so‘ralgan.
Shuningdek, yo‘llarda harakatlanayotgan piyodalarga hurmat bilan munosabatda bo‘lish hamda ehtiyotkorlikni oshirish tavsiya etilgan. Bundan tashqari, boshqarma avtomobillarni ko‘p qavatli binolar, daraxtlar yoki inshootlar tagida qoldirmaslikni, balki maxsus turargohlardan foydalanishni maslahat berdi.
Chunki qorli va nam ob-havo sharoitida tomdan muz bo‘laklari tushishi yoki daraxt shoxlari sinishi ehtimoli mavjud. Shu sababli, bu kabi xavf-xatarlarga beparvo bo‘lmaslik kerak.
Eslatib o‘tamiz, O‘zgidromet xizmati 22–24-yanvar kunlari mamlakatga nam va sovuq havo massalari kirib kelishi haqida ogohlantirgan edi. Shu bois, haydovchilar va piyodalardan yo‘lda ortiqcha shoshilmaslik, xavfsizlik choralariga qat’iy rioya qilish hamda o‘z hayotini xavf ostiga qo‘ymaslik so‘raladi.
