O‘zbekistonda 2025 yilgacha 21 ming km yo‘l ta’mirlandi

O‘zbekiston avtomobil yo‘llarini rivojlantirish, ularni zamonaviy talablarga moslashtirish va infratuzilma sifatini oshirish bo‘yicha keng ko‘lamli ishlar olib borilmoqda. Bu haqda Zamin.uz xabar berdi.

Avtomobil yo‘llari qo‘mitasi ma’lumotiga ko‘ra, mamlakatimizdagi yo‘llarning umumiy uzunligi 184 596 kilometrni tashkil etadi. Shundan 42 371 kilometri umumiy foydalanishdagi yo‘llar, 142 225 kilometri esa shahar va qishloq ichki ko‘chalari hisoblanadi.

2025 yil soha uchun samarali yil bo‘ldi. Jami 4 318 ta obyektda 15 trillion 758 milliard so‘mlik ishlar amalga oshirilib, 21 553 kilometr yo‘l va 320 ta ko‘prik tubdan ta’mirlandi.

Avvalgi «resurs usuli»dan voz kechilib, xalqaro standartlarga mos «hajm usuli»ga o‘tildi. Shuningdek, xalqaro moliya institutlari yordamida 300,3 million dollar mablag‘ o‘zlashtirilib, 213 kilometrdan ortiq zamonaviy yo‘llar qurildi.

Mamlakatimizda strategik ahamiyatga ega inshootlar barpo etildi. Xivada 550 metrlik yerosti avtomobil yo‘li qurilishi amalga oshirildi.

Jizzaxda Sharof Rashidov tumanida Islom Karimov ko‘chasini M-39 trassasiga bog‘lovchi 4 kilometrli yo‘l va 700 metrlik yo‘l o‘tkazgich ishga tushirildi. Toshkentda esa Maxtumquli ko‘chasidan Yangi O‘zbekiston bog‘igacha bo‘lgan yo‘llar yangilandi va Olimpiya shaharchasi atrofida 21 kilometr masofali sport yo‘lakchalari barpo etildi.

Yo‘llarning xizmat muddatini uzaytirish maqsadida yuk avtomobillari uchun vazn nazorati tizimi kuchaytirildi. Respublika bo‘ylab 86 ta zamonaviy o‘lchov shoxobchasi o‘rnatilmoqda, ulardan 41 tasi bo‘yicha ishlar allaqachon boshlangan.

Shuningdek, Bo‘stonliq tumanida piyodalar uchun mo‘ljallangan yerosti o‘tish tunneli rekord darajadagi qisqa muddatda — atigi 48 soat ichida qurib bitkazildi. Bu kabi loyihalar yo‘l infratuzilmasini rivojlantirishga xizmat qilmoqda.

Bundan tashqari, sohaga oid 42 ta normativ-huquqiy hujjat va standartlar xorijiy tajribalar asosida qayta ishlab chiqildi. Bu yangiliklar yo‘l qurilishida sifatni yangi bosqichga olib chiqishga imkon yaratadi.