O‘zbekiston Tinchlik kengashiga qo‘shilish sabablarini izohladi
O‘zbekiston Prezidenti Shavkat Mirziyoyevning tashqi siyosat bo‘yicha maslahatchisi Abdulaziz Komilov mamlakatning Tinchlik kengashiga qo‘shilish qarori haqida batafsil izoh berdi. Bu haqda Zamin.uz xabar berdi.
Unga ko‘ra, bu qaror, avvalo, xavfsizlik masalalari va tashqi siyosatning ustuvor yo‘nalishlariga zid kelmasligi bilan bog‘liq. Komilovning aytishicha, mazkur qarorga uchta asosiy omil ta’sir ko‘rsatgan.
Birinchisi, milliy manfaatlar nuqtayi nazaridan xavfsizlik masalalari, ikkinchisi, Tinchlik kengashining maqsad va vazifalari O‘zbekistonning tashqi siyosat prinsiplariga mos kelishi, uchinchisi esa Yaqin Sharq mintaqasida mamlakatning muhim manfaatlariga ega ekanligidir. Komilovning ta’kidlashicha, ushbu tashabbusning muhim yo‘nalishlaridan biri G‘azo sektoridagi harbiy va iqtisodiy inqirozni bartaraf etishdir.
Shuningdek, bu tashabbus AQSH Prezidenti Donald Tramp tomonidan ilgari surilganiga ham e’tibor qaratildi. Maslahatchi Yaqin Sharqdagi vaziyat faqat iqtisodiy yoki diplomatik manfaatlar bilan cheklanmasligini, balki bu o‘zgarishlar global va milliy xavfsizlikka ham bevosita ta’sir ko‘rsatishini qayd etdi.
Komilov ekstremizm tahdidlari haqida ham to‘xtalib o‘tdi. Ayrim O‘zbekiston fuqarolari ekstremistik guruhlarga qo‘shilib, keyinchalik mamlakatga qaytgan holatlar kuzatilgani, davlat esa ularning jamiyatga moslashuvi uchun sharoit yaratganini ta’kidladi.
Bu yondashuv xalqaro miqyosda e’tirof etilib, BMT rahbariyati tomonidan yuqori baholangan. Shuningdek, Yaqin Sharqdagi vaziyat Afg‘oniston xavfsizligiga ham ta’sir ko‘rsatishi mumkinligi qayd etildi.
Komilov xalqaro hamjamiyatni, jumladan AQSH, arab va musulmon davlatlarini, shuningdek, Markaziy Osiyo mamlakatlarini birgalikda harakat qilishga chaqirdi. O‘zbekiston rahbarining Tinchlik kengashi doirasidagi faoliyati mamlakatning xalqaro maydondagi nufuzini oshirishi ta’kidlandi.
Ma’lum qilinishicha, Prezident Shavkat Mirziyoyev Davosdagi Jahon iqtisodiy forumi doirasida Donald Tramp bilan mazkur masala yuzasidan kelishuv imzolagan. Xulosa shuki, O‘zbekiston Tinchlik kengashiga xavfsizlik va milliy manfaatlar logikasiga asoslangan holda qo‘shildi.
Bu yondashuv mamlakatning uzoq muddatli xavfsizligini ta’minlashga qaratilgan.
