O‘zbekiston armiyasi Markaziy Osiyoda yetakchilikni saqlab qoldi

Global Firepower tashkiloti tomonidan tuzilgan yangilangan harbiy qudrat indeksida O‘zbekiston Qurolli kuchlari o‘z mavqeini mustahkamlab, Markaziy Osiyo davlatlari o‘rtasida yetakchi o‘rinni egalladi. Bu haqda Zamin.uz xabar berdi.

Ushbu reytingda 145 davlat qamrab olingan bo‘lib, O‘zbekiston 53-o‘rinni egalladi. Bu haqda podrobno.uz xabar bermoqda.

2026 yilgi reytingga ko‘ra, O‘zbekiston o‘tgan yilga nisbatan besh pog‘ona yuqorilab, 58-o‘rinda bo‘lgan Qozog‘istondan o‘zib ketdi. Reytingda mamlakatning asosiy ustunliklaridan biri sifatida safarbarlik salohiyati ko‘rsatilgan.

36,5 million aholining qariyb 16 millioni harbiy xizmatga yaroqli deb baholangan. Qurolli kuchlarda esa 120 mingga yaqin harbiy xizmatchi xizmat qiladi, ularning asosiy qismi quruqlik qo‘shinlariga tegishli.

Armiya texnik ta’minoti ham yuqori ko‘rsatkichlarga ega. Mamlakat ixtiyorida 470 ta tank, 8 692 ta zirhli texnika va 177 ta o‘ziyurar artilleriya mavjud bo‘lib, ushbu yo‘nalishda O‘zbekiston dunyoda 23-o‘rinni egallaydi.

Harbiy havo kuchlari tasarrufida 159 ta uchish texnikasi mavjud, shundan 101 tasi vertolyotlardir. Jumladan, 34 ta zarba vertolyoti mamlakatga global reytingda 20-o‘rinni ta’minlagan.

Umuman olganda, O‘zbekistonning qo‘shinlar tarkibi va texnik imkoniyatlari Markaziy Osiyoda harbiy yetakchilik mavqeini mustahkamladi. Mintaqadagi boshqa davlatlarning reytingdagi o‘rinlari quyidagicha: Qozog‘iston – 58, Turkmaniston – 78, Tojikiston – 100, Qirg‘iziston – 109.