Gulistonda narkolaboratoriya fosh etildi, 1,8 mlrd so‘mlik moddalar topildi
O‘zbekiston Davlat xavfsizlik xizmati va Ichki ishlar vazirligi tomonidan 20-yanvardan boshlab keng koʻlamli tezkor-qidiruv va profilaktika tadbirlari oʻtkazilmoqda. Bu haqda Zamin.uz xabar berdi.
Ushbu chora-tadbirlar jinoyatchilikning oldini olish, giyohvandlik savdosiga qarshi kurash hamda mamlakatdagi kriminogen vaziyatni barqarorlashtirishga qaratilgan. Bu haqda uzdaily.uz xabar berdi.
Sirdaryo viloyatining Guliston shahrida avval sudlangan, 2002-yilda tugʻilgan shaxs boshqaruvidagi “Gentra” avtomobili tekshirilganida uning telefonida narkotik moddalar bilan bogʻliq maʼlumotlar aniqlangan. Oʻtkazilgan tergov natijasida ushbu shaxs 2025-yil dekabridan beri bir nechta Telegram kanallarida narkotik moddalarni tarqatish bilan shugʻullanib kelgani, shuningdek, Gulistonda yashirin narkolaboratoriya tashkil qilgani maʼlum boʻldi.
Uning uyidan 2,787 kilogramm “Pregabalin”, 1 900 dona “Pregabalin” kapsulasi, 150 dona va 1 litr suyuq “Tropikamid” hamda maxsus uskunalar topildi. Musodara qilingan mahsulotlarning umumiy qiymati 1,8 milliard so‘mga baholandi.
Holat yuzasidan Jinoyat kodeksining 251-1-moddasi bo‘yicha jinoyat ishi qo‘zg‘atilib, tergov ishlari davom etmoqda. Toshkent viloyatida esa 1983, 1988 va 1998-yillarda tug‘ilgan uch fuqaro kuchli taʼsir qiluvchi “Regapen” tabletkalarini noqonuniy sotishda gumonlanib qo‘lga olindi.
Ular “Spark” avtomobilida 144 dona “Regapen” va 89 dona “Zardeks” tabletkasini saqlashgan. Tergov davomida Yunusobod tumanidagi ijaraga olingan uyda 7 784 dona “Regapen” va 200 dona “Zardeks” tabletkasi topildi.
Shuningdek, Qo‘qon shahridan bo‘lgan, 1994-yilda tug‘ilgan shaxs Qirg‘izistondan Toshkentga 5 000 dona “Zardeks” olib kirishga urinishda ushlangan. Umuman olganda, tadbirlar davomida 13 217 dona kuchli taʼsir qiluvchi preparat musodara qilindi.
Toshkent shahrining Mirobod tumanida esa bosqinchilikda gumon qilingan guruh qo‘lga olindi. 1995-yilda tug‘ilgan shaxs va uning sheriklari ikki fuqaroni do‘pposlab, 500 AQSh dollarini qo‘lga kiritishga uringan.
Shuningdek, “Malika” savdo majmuasida telefon savdosi bilan shug‘ullangan, 2003-yilda tug‘ilgan shaxs ham ushlangan. U to‘lov masalasida kelib chiqqan kelishmovchilik sabab xaridorga tan jarohati yetkazgan.
Ushbu holatlar bo‘yicha tegishli jinoyat ishlari qo‘zg‘atilib, gumonlanuvchilarga nisbatan ehtiyot chorasi sifatida qamoqqa olish qo‘llandi.
