Samarqandda 500 mln dollarlik qog‘oz zavodi quriladi
Samarqand viloyatida sanoat kartoni, qadoqlash va ofis qog‘ozlarini ishlab chiqaruvchi yirik zavod qurilishi rejalashtirilmoqda. Bu haqda Zamin.uz xabar berdi.
Ushbu loyiha uchun Xitoyning Hanrun Paper Company kompaniyasi tomonidan 500 million AQSH dollari miqdorida sarmoya kiritilishi ko‘zda tutilgan. Bu haqda kompaniya vakillari Samarqand viloyati hokimi Adiz Boboyev bilan uchrashuvda ma’lum qilishgan.
Ushbu xabar uzdaily.uz saytida e’lon qilingan. Loyihaga ko‘ra, zamonaviy ishlab chiqarish majmuasi besh bosqichda qurilib, ishga tushiriladi.
Bu majmua sanoat kartoni, qadoqlash qog‘ozi va ofis qog‘ozi ishlab chiqarishga ixtisoslashadi. Zavod faoliyati uchun 50 gektardan ortiq yer maydoni ajratilishi rejalashtirilgan.
Hozirda Urgut erkin iqtisodiy zonasi hududidagi “Hishrau 2” massivida yer uchastkalari tanlanmoqda va yaqin kunlarda ushbu yerlar auksionga chiqarilishi kutilmoqda. Investorlarga ko‘ra, bu zavod Markaziy Osiyoda o‘ziga xos yirik korxona bo‘ladi.
Loyihaning amalga oshirilishi natijasida qariyb 3 mingta yangi ish o‘rni yaratiladi. Shuningdek, korxona ishga tushgach, davlat budjetiga yiliga 50–60 million AQSH dollari miqdorida soliq tushumlari kelib tushishi prognoz qilinmoqda.
Viloyat hokimi bu loyiha hududning ijtimoiy-iqtisodiy rivojlanish dasturlariga mosligini ta’kidlab, loyiha jarayonini qo‘llab-quvvatlash uchun zarur tashkiliy va infratuzilmaviy masalalar tezkorlik bilan hal etilishini ma’lum qildi.
