Telekommunikatsiya xizmatlari bo‘yicha yangi qoidalar tasdiqlandi
Adliya vazirligi va Raqamli texnologiyalar vazirligi hamkorlikda telekommunikatsiya xizmatlari bo‘yicha yangi qoidalarni tasdiqladi. Bu haqda Zamin.uz xabar berdi.
Ushbu qoidalar abonentlar uchun qulaylik yaratishga qaratilgan bo‘lib, xizmatlar adolatli va tushunarli bo‘lishi maqsad qilingan. Quyida mazkur hujjatdagi asosiy o‘zgarishlar haqida qisqacha ma’lumot beramiz.
Birinchi yangilik – abonent raqami “o‘chib ketishi” uchun muddat bir yilgacha uzaytirildi. Agar abonent hisobida mablag‘ yetarli bo‘lmasa ham, uning raqami avvalgidek ikki oydan keyin emas, bir yil davomida saqlanib qoladi.
Ikkinchi yengillik – tarif rejasini bepul almashtirish imkoniyati joriy etildi. Endi abonentlar istalgan tarif rejasiga hech qanday qo‘shimcha to‘lovsiz o‘tishi mumkin.
Faqat ayrim maxsus tariflar bundan mustasno. Uchinchi o‘zgarish – tarif shartlari o‘zgarganda, abonentlarni kamida 15 kun oldin xabardor qilish majburiy qilib belgilandi.
Bu orqali kutilmagan narx o‘zgarishlarining oldi olinadi. To‘rtinchi yangilik – olis hududlardagi aholiga qulaylik yaratish maqsadida sayyor xizmatlar yo‘lga qo‘yiladi.
Xizmat ko‘rsatish punktiga bora olmaydigan fuqarolar uchun mobil aloqa xizmatlari yashash joyiga borib amalga oshiriladi. Beshinchi qoidaga ko‘ra, hisobni ataylab qarzga tushirish taqiqlanadi.
Endilikda tarif to‘lovlari va xizmatlarni faollashtirish jarayonida abonent hisobida qarzdorlik yuzaga kelishiga yo‘l qo‘yilmaydi. Oltinchi yangilik – Prezident virtual qabulxonasining ishonch telefonlariga kecha-kunduz bepul qo‘ng‘iroq qilish imkoniyati ta’minlandi.
Yettinchi o‘zgarish – abonent raqamlarini boshqa tarmoqqa ko‘chirish jarayoni sezilarli darajada tezlashtirildi. Endi bu jarayon 8 ish soati emas, 20 daqiqa ichida amalga oshiriladi.
Sakkizinchi yangilik – pullik xizmatlarga obuna bo‘lish tartibi qat’iy nazoratga olinadi. Abonentning roziligisiz xizmatlarni avtomatik faollashtirish yoki bepul xizmatni pullikka aylantirish taqiqlanadi.
Shuningdek, barcha pullik xizmatlar dastlab nofaol bo‘lishi shart. Mazkur qoidalar 27-apreldan kuchga kiradi.
Agar ular amalda to‘liq ishlasa, abonentlar uchun ko‘plab noqulayliklar bartaraf etiladi. Eng muhimi, xizmatlar shaffofroq va qulayroq bo‘lishi ta’minlanadi.
Manba: Zamin.uz.
