Ichki ishlar vazirligida rahbariyat tarkibi yangilandi

Prezident Shavkat Mirziyoyev Ichki ishlar vazirligida kadrlar o‘zgarishi bo‘yicha bir qator qarorlar qabul qildi. Bu haqda Zamin.uz xabar berdi.

Bu haqda UzDaily.uz xabar berdi. Ayubxon Rahmatullayev Ichki ishlar vazirligi birinchi o‘rinbosari — Operativ-qidiruv departamenti boshlig‘i lavozimidan boshqa ishga o‘tgani sababli ozod etildi.

Davron Nazarmuhamedov esa IIV vazir o‘rinbosari — Ma’naviy-ma’rifiy ishlar va kadrlar ta’minoti departamenti boshlig‘i lavozimini tark etdi. Bo‘shagan lavozimlarga yangi rahbarlar tayinlandi.

Botir Qudrathodjayev Ichki ishlar vazirligi birinchi o‘rinbosari — Operativ-qidiruv departamenti boshlig‘i etib tayinlandi. U avval Favqulodda vaziyatlar vaziri sifatida faoliyat yuritgan.

Rustam Jurayev IIV birinchi o‘rinbosari — Jamoat xavfsizligi departamenti boshlig‘i lavozimiga tayinlandi. Shu munosabat bilan u O‘zbekiston Milliy gvardiyasi qo‘mondoni lavozimidan ozod etildi.

Shuningdek, Rustam Mirzayev korrupsiyaga qarshi kurashish bo‘yicha ichki nazorat va komplaens masalalari bo‘yicha IIV vazir o‘rinbosari lavozimiga tayinlandi. U avval Prezident Administratsiyasi Kommunikatsiyalar departamenti boshlig‘i o‘rinbosari sifatida ishlagan.

Diyorbek Sattorov esa IIV vazir o‘rinbosari — Ma’naviy-ma’rifiy ishlar va kadrlar ta’minoti departamenti boshlig‘i etib tayinlandi. Tayinlovga qadar u Prezident Administratsiyasining Jamoat xavfsizligi va qonun ustuvorligi masalalari departamentida sektor mudiri lavozimida faoliyat yuritgan.
"ONE.UZ" yangiliklarini "Telegram"da kuzatib boring