O‘zbekiston turizmi Singapurda targ‘ib qilindi
Singapurda O‘zbekistonning turizm salohiyatini targ‘ib qilishga qaratilgan navbatdagi tadbir – road-shou bo‘lib o‘tdi. Bu haqda Zamin.uz xabar berdi.
Ushbu tadbir O‘zbekiston Respublikasi Turizm qo‘mitasi va Uzbekistan Airways hamkorligida tashkil etildi. Bu haqda uzdaily.uz xabar berdi.
Road-shou doirasida O‘zbekistondan kelgan turizm va xizmat ko‘rsatish sohasidagi 30 nafar vakil Singapurning 70 dan ortiq turizm va servis kompaniyalari bilan uchrashuvlar o‘tkazdi. Uchrashuvlarda ishtirokchilarga O‘zbekistonning madaniy-tarixiy merosi, ziyorat turizmi, gastronomik, ekologik va tog‘ turizmi imkoniyatlari haqida batafsil ma’lumot berildi.
Xususan, xorijiy sayyohlar uchun qulay sharoit yaratishga qaratilgan «Umra plyus» loyihasi alohida ta’kidlandi. O‘zbekiston vakillari sayohatchilar xavfsizligini ta’minlash, turizm infratuzilmasini rivojlantirish, raqamli xizmatlarni joriy etish va xizmat ko‘rsatish sifatini xalqaro standartlarga moslashtirish bo‘yicha amalga oshirilayotgan chora-tadbirlar haqida ma’lumot berdi.
Mutaxassislarning ta’kidlashicha, «Umra plyus» loyihasi O‘zbekiston turizm sohasining raqobatbardoshligini oshirishda muhim omil hisoblanadi. Tadbir davomida tog‘ turizmini rivojlantirish dasturi doirasida yaratilgan zamonaviy sharoitlar va yangi sayyohlik yo‘nalishlari ham taqdim etildi.
Uchrashuvlarda hamkorlikni kengaytirish, yangi qo‘shma turistik paketlar ishlab chiqish va sohaga investitsiyalar jalb qilish masalalari muhokama qilindi. Mazkur road-shou O‘zbekistonning xalqaro turizm bozoridagi mavqeini mustahkamlashda, Singapur bilan turizm sohasidagi aloqalarni rivojlantirishda va yangi investitsion imkoniyatlarni ochishda muhim qadam bo‘ldi.
