Majburiy mehnat: Hokimliklarga rasmiy ogohlantirish berildi
O‘zbekistonda ayrim hududlarda mahalliy hokimiyat organlari xodimlarni aholini ro‘yxatga olish ishlariga ish vaqtidan tashqari majburan jalb qilgan holatlar aniqlangan. Bu haqda Zamin.uz xabar berdi.
Mehnat inspeksiyasi ma’lumotiga ko‘ra, bunday vaziyatlar ayrim joylarda "majburiy topshiriq" sifatida amalga oshirilgan. O‘tkazilgan tekshiruvlar natijasida Buxoro shahri, Oltinko‘l, Asaka va Marhamat tumanlari hokimliklariga rasmiy ogohlantirish xatlari yuborilgan.
Shuningdek, Andijon viloyati hokimligiga qonunbuzarliklarni bartaraf etish bo‘yicha taqdimnoma kiritilgan. Mehnat inspeksiyasi ta’kidlaganidek, xodimlarni roziligisiz ish vaqtidan tashqari ishlarga jalb qilish majburiy mehnat hisoblanadi va bu holat amaldagi qonunchilikka zid.
Ayniqsa, bunday qonunbuzarliklarning davlat organlari tomonidan sodir etilishi jiddiy tashvishga sabab bo‘lmoqda. Inspeksiya eslatishicha, ish vaqtidan tashqari mehnat faqat xodimning ixtiyoriy roziligi bilan amalga oshirilishi kerak.
Bunda O‘zbekiston Respublikasi Mehnat kodeksining 262-moddasiga muvofiq, qo‘shimcha ish uchun tegishli haq to‘lanishi shart. Qonunga binoan, dastlabki ikki soat uchun kamida 1,5 baravar, undan keyingi soatlar uchun esa kamida 2 baravar miqdorda ish haqi to‘lanishi belgilangan.
Manba: one.uz
