O‘zbekistonda ta’lim olayotgan xorijliklar soni oshdi

Milliy statistika qo‘mitasi tomonidan e’lon qilingan dastlabki ma’lumotlarga ko‘ra, 2025-yil davomida O‘zbekistonga ta’lim olish maqsadida jami 39 700 nafar xorijlik talaba kelgan. Bu haqda Zamin.uz xabar berdi.

Bu ko‘rsatkich o‘tgan yilning shu davriga nisbatan 58,2 foizga yuqori. Ushbu o‘sish xorijliklar orasida O‘zbekistonda ta’lim olishga qiziqish ortayotganini ko‘rsatadi.

Statistik ma’lumotlarga qaraganda, xorijiy talabalarning eng ko‘p qismi Hindistondan kelgan bo‘lib, ularning soni 17 241 nafarga yetgan. Ikkinchi o‘rinda Turkmaniston fuqarolari bo‘lib, ular 9 349 nafarni tashkil etadi.

Keyingi o‘rinda Tojikistonlik talabalar qayd etilgan bo‘lib, ularning soni 2 904 nafarni tashkil qiladi. Shuningdek, Pokiston (1 779), Xitoy (1 428), Janubiy Koreya (917), Qirg‘iziston (912), Misr (893), Filippin (745) va AQSh (482) fuqarolari ham O‘zbekistonda ta’lim olish uchun tanlov qilgan.

Qolgan 3 011 nafar talaba esa boshqa davlatlardan kelgan. Ushbu ma’lumotlar xorijlik talabalar orasida O‘zbekiston oliy ta’lim muassasalariga qiziqish ortib borayotganini tasdiqlaydi.

Manba: zamin.uz